---
title: "'നമുക്ക് സംസാരിക്കാം'; ഗുസ്തി താരങ്ങളെ ചർച്ചയ്ക്ക് ക്ഷണിച്ച് കേന്ദ്ര കായികമന്ത്രി"
english_title: "Wrestling players strike"
publisher: "malayorashabdam.in"
canonical_url: "https://malayorashabdam.truevisionnews.com/news/120367/wrestling-players-strike"
published_at: "2023-06-07T11:59:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/648023cecde53_protesting-wrestlers-100812522.png"
keywords: []
---

# 'നമുക്ക് സംസാരിക്കാം'; ഗുസ്തി താരങ്ങളെ ചർച്ചയ്ക്ക് ക്ഷണിച്ച് കേന്ദ്ര കായികമന്ത്രി

> **Lead Summary:** ന്യൂഡൽഹി: ബിജെപി എംപിയും ഇന്ത്യൻ ഗുസ്തി ഫെഡറേഷൻ മുൻ അധ്യക്ഷൻ ബ്രിജ് ഭൂഷനെതിരെ ലൈംഗികാരോപണം അടക്കമുന്നയിച്ച് സമരം നടത്തുന്ന ഗുസ്തി താരങ്ങളുമായി ചർച്ചയ്ക്ക് സന്നദ്ധത അറിയിച്ച് കേന്ദ്ര സർക്കാർ. അവരുടെ ആശങ്കകൾ ചർച്ച ചെയ്യാമെന്ന് കേന്ദ്ര കായിക മന്ത്രി അനുരാഗ് താക്കൂർ തന്നെയാണ് രംഗത്തുവന്നിരിക്കുന്നത്.

## Article Content

ന്യൂഡൽഹി: ബിജെപി എംപിയും ഇന്ത്യൻ ഗുസ്തി ഫെഡറേഷൻ മുൻ അധ്യക്ഷൻ ബ്രിജ് ഭൂഷനെതിരെ ലൈംഗികാരോപണം അടക്കമുന്നയിച്ച് സമരം നടത്തുന്ന ഗുസ്തി താരങ്ങളുമായി ചർച്ചയ്ക്ക് സന്നദ്ധത അറിയിച്ച് കേന്ദ്ര സർക്കാർ. അവരുടെ ആശങ്കകൾ ചർച്ച ചെയ്യാമെന്ന് കേന്ദ്ര കായിക മന്ത്രി അനുരാഗ് താക്കൂർ തന്നെയാണ് രംഗത്തുവന്നിരിക്കുന്നത്.

ട്വീറ്റ് വന്ന് മണിക്കൂറുകൾക്കുള്ളിൽ തന്നെ ഭജറംഗ് പുനിയും സാക്ഷി മാലിക്കും രംഗത്തും ചർച്ചയ്ക്കായി എത്തിയിട്ടുണ്ട്. കൂടുതൽ താരങ്ങൾ എത്തുമോ എന്നാണ് കണ്ടറിയേണ്ടത്.ശനിയാഴ്ച അർദ്ധരാത്രി കേന്ദ്ര ആഭ്യന്തര മന്ത്രി അമിത് ഷായുമായി നടത്തിയ കൂടിക്കാഴ്ചയ്ക്ക് പിന്നാലെയാണ് ചർച്ചകൾക്ക് സന്നദ്ധത അറിയിച്ച് മന്ത്രി രംഗത്തുവന്നിരിക്കുന്നത്. ഇന്നലെ അർദ്ധ രാത്രിയോടെയാണ് അനുരാഗ് താക്കൂറിന്റെ ട്വീറ്റ് പുറത്തുവന്നിരിക്കുന്നത്.

> "ഗുസ്തിക്കാരുമായി അവരുടെ പ്രശ്‌നങ്ങളിൽ ചർച്ചയ്ക്ക് സർക്കാർ തയ്യാറാണ്. അതിനായി ഗുസ്തിക്കാരെ ഞാൻ ഒരിക്കൽ കൂടി ക്ഷണിച്ചിട്ടുണ്ട്," താക്കൂർ ട്വീറ്റ് ചെയ്തു.

ഏഴിലധികം ലൈംഗികാരോപണം നേരിടുന്ന ബ്രിജ് ഭഷനെ അറസ്റ്റ് ചെയ്യണമെന്നതാണ് ഇവരുടെ പ്രധാന ആവശ്യം. പിന്നീട്, പാർലമെന്റ് മന്ദിരത്തിന്റെ ഉദ്ഘാടന ദിനത്തിൽ നാടകീയമായ സംഭവങ്ങൾ ഉണ്ടായിരുന്നു. അതിന് പിന്നാലെ താരങ്ങൾ തങ്ങൾക്ക് ലഭിച്ച മെഡലുകൾ ഗംഗയിൽ ഒഴുക്കാൻ തയ്യാറായിരുന്നു. പിന്നീട്, കർഷക നേതാക്കൾ ഇടപെട്ടാണ് ഇതിൽ നിന്നും പിൻവലിച്ചത്.

ഒളിംപിക് മെഡൽ ജേതാവ് ഭജറംഗ് പുനിയ അമിത് ഷായുമായി നടത്തിയ കൂടിക്കാഴ്ച നടത്തിയതിനേക്കുറിച്ച് ദേശീയ മാധ്യമമായ എൻഡിടിവിയ്ക്ക് നൽകിയ അഭിമുഖത്തിൽ പറയുന്നുണ്ട്. അർദ്ധരാത്രി നടന്ന യോഗത്തെക്കുറിച്ച് സംസാരിക്കരുതെന്ന് സമരക്കാരോട് സർക്കാർ ആവശ്യപ്പെട്ടതായി പറഞ്ഞിട്ടുണ്ട്.

അതേസമയം, ആഭ്യന്തര മന്ത്രി അമിത് ഷായുമായി രഹസ്യ ധാരണയുണ്ടാക്കിയതായുള്ള പ്രചരണങ്ങൾ പുനിയ തള്ളിയിട്ടുണ്ട്. അന്വേഷണം മുന്നോട്ട് പോകുമെന്ന് അമിത് ഷാ തങ്ങളോട് വ്യക്തമാക്കിയിട്ടുണ്ടെന്ന് അദ്ദേഹം പറഞ്ഞു.

### Related Links & Sources
- [Original Story Source](https://malayorashabdam.truevisionnews.com/news/120367/wrestling-players-strike)