---
title: "തിരിച്ചറിയാനാകാത്ത തരത്തിൽ ടൈറ്റണിൽ മൃതദേഹാവശിഷ്ടങ്ങൾ; വിശദമായ പരിശോധന,"
english_title: "Tittan submarine blast"
publisher: "malayorashabdam.in"
canonical_url: "https://malayorashabdam.truevisionnews.com/news/125874/tittan-submarine-blast"
published_at: "2023-06-29T12:08:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/649d26f123c34_titanic-sub-101356820.png"
keywords: []
---

# തിരിച്ചറിയാനാകാത്ത തരത്തിൽ ടൈറ്റണിൽ മൃതദേഹാവശിഷ്ടങ്ങൾ; വിശദമായ പരിശോധന,

> **Lead Summary:** **വാഷിംഗ്ടൺ**: സമുദ്രപേടകം ടൈറ്റൺ പൊട്ടിത്തകർന്ന് മരിച്ചവരുടെ ശരീരഭാഗങ്ങൾ ലഭിച്ചതായി റിപ്പോർട്ട്. കടലിന്റെ അടിത്തട്ടിൽ നിന്ന് മൃതദേഹങ്ങളുടെ ഭാഗങ്ങൾ ലഭിച്ചതായി യുഎസ് കോസ്റ്റ് ഗാർഡിനെ ഉദ്ധരിച്ച് വിദേശ മാധ്യമങ്ങൾ റിപ്പോർട്ട് ചെയ്തു. ലഭ്യമായ ശരീരഭാഗങ്ങൾ വിശദമായ പരിശോധനകൾക്ക് വിധേയമാക്കും.

## Article Content

**വാഷിംഗ്ടൺ**: സമുദ്രപേടകം ടൈറ്റൺ പൊട്ടിത്തകർന്ന് മരിച്ചവരുടെ ശരീരഭാഗങ്ങൾ ലഭിച്ചതായി റിപ്പോർട്ട്. കടലിന്റെ അടിത്തട്ടിൽ നിന്ന് മൃതദേഹങ്ങളുടെ ഭാഗങ്ങൾ ലഭിച്ചതായി യുഎസ് കോസ്റ്റ് ഗാർഡിനെ ഉദ്ധരിച്ച് വിദേശ മാധ്യമങ്ങൾ റിപ്പോർട്ട് ചെയ്തു. ലഭ്യമായ ശരീരഭാഗങ്ങൾ വിശദമായ പരിശോധനകൾക്ക് വിധേയമാക്കും.

മെഡിക്കൽ വിദഗ്ധരുടെ കൂടുതൽ വിശകലനത്തിനായി ശരീരഭാഗങ്ങൾ ന്യൂഫൗണ്ട്ലാൻഡിലെ സെന്റ് ജോൺസിൽ നിന്ന് കോസ്റ്റ് ഗാർഡ് കട്ടറിലുള്ള യുഎസ് തുറമുഖത്തേക്ക് മാറ്റും. അമേരിക്കയിൽ നിന്നുള്ള വിദഗ്ധ സംഘം ടൈറ്റൺ പേടകത്തിൽ നിന്ന് മൃതദേഹങ്ങളുടെ ഭാഗങ്ങൾ വീണ്ടെടുത്ത് പരിശോധന നടത്തും. അഞ്ച് പേരുടെ മരണത്തിനിടയാക്കിയ ടൈറ്റൻ പേടകത്തിൻ്റെ കൂടുതൽ ഭാഗങ്ങൾ കഴിഞ്ഞ ദിവസം കണ്ടെത്തിയിരുന്നു. തകർന്ന ടൈറ്റാനിക് കപ്പൽ കാണാൻ ടൈറ്റൺ പേടകത്തിൽ പോയ അഞ്ച് പേരാണ് പേടകം പൊട്ടിത്തകർന്ന് മരിച്ചത്.

ടൈറ്റണിൽ യാത്ര ചെയ്തിരുന്നവരുടെ മൃതദേഹഭാഗങ്ങൾ ലഭ്യമായെന്ന റിപ്പോർട്ടിനോട് പ്രതികരിക്കാൻ കാനഡ തയ്യാറായില്ല. പേടകത്തിനായി തെരച്ചിൽ നടത്തിയ രാജ്യങ്ങളിൽ കാനഡ സജീവമായിരുന്നു. ടൈറ്റൺ പൊട്ടിത്തകരാനുണ്ടായ കാര്യങ്ങൾ മനസിലാക്കാനും ഇത്തരത്തിലുള്ള ദുരന്തം ആവർത്തിക്കാതിരിക്കാനും ലഭ്യമായ വസ്തുക്കളുടെ പരിശോധന സഹായിക്കുമെന്ന് യുഎസിൻ്റെ തെരച്ചിൽ സംഘത്തിന് നേതൃത്വം നൽകിയ ക്യാപ്റ്റൻ ജേസൺ പറഞ്ഞു.

തകർന്ന പേടകത്തിൻ്റെ ഭാഗങ്ങൾ സമുദ്രോപരിതലത്തിൽ എത്തിച്ചതോടെ ദൗത്യം അവസാനിച്ചതായി യുഎസ് കോസ്റ്റ ഗാർഡ് വ്യക്തമാക്കിയിരുന്നു. പിൻഭാഗത്തെ കോണാകൃതിയിലുള്ള ഭാഗമാണ് ആഭ്യം കണ്ടെത്തിയത്. കടലിൻ്റെ അടിത്തട്ടിലേക്ക് യാത്ര ചെയ്യുന്നതിനിടെ മർദ്ദത്തെത്തുടർന്ന് ടൈറ്റൺ പേടകം ഉൾവലിഞ്ഞ് പൊട്ടിത്തകരുകയായിരുന്നു. കാർബൺ ഫൈബറും ടൈറ്റാനിയവും കൊണ്ടാണ് ടൈറ്റൻ നിർമ്മിച്ചിരുന്നത്. അഞ്ച് പേർക്ക് യാത്ര ചെയ്യാവുന്ന പേടകത്തിൻ്റെ ഭാരം 23,000 പൗണ്ട് ആണ്.

യാത്ര ആരംഭിച്ച് ഒരു മണിക്കൂറിന് ശേഷം പേടകം തകർന്നുവെന്നാണ് റിപ്പോർട്ട്. ഓഷ്യൻഗേറ്റ് സിഇഒ സ്റ്റോക്ക്‌ടൺ റഷ്, ബ്രിട്ടീഷ് കോടീശ്വരൻ ഹാമിഷ് ഹാർഡിംഗ്, പ്രശസ്ത ഫ്രഞ്ച് ഡൈവർ പോൾ - ഹെൻറി നർഗോലെറ്റ്, പാകിസ്താൻ വ്യവസായി ഷഹ്‌സാദ ദാവൂദ്, അദ്ദേഹത്തിന്റെ 19കാരനായ മകൻ സുലെമാൻ എന്നിവരായിരുന്നു ടൈറ്റണിൽ ഉണ്ടായിരുന്നത്.

### Related Links & Sources
- [Original Story Source](https://malayorashabdam.truevisionnews.com/news/125874/tittan-submarine-blast)