---
title: "ബംഗാളിൽ വ്യാപക സംഘർഷം - 9 മരണം, നിരവധി പേർക്ക് പരിക്ക്"
english_title: "Bengal election people's died"
publisher: "malayorashabdam.in"
canonical_url: "https://malayorashabdam.truevisionnews.com/news/128576/bengal-election-peoples-died"
published_at: "2023-07-08T15:45:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/64a9386e469c1_bengal-panchayat-polls-violence-101591792.png"
keywords: []
---

# ബംഗാളിൽ വ്യാപക സംഘർഷം - 9 മരണം, നിരവധി പേർക്ക് പരിക്ക്

> **Lead Summary:** **കൊൽക്കത്ത**: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് നടക്കുന്ന ബംഗാളിൽ വ്യാപക സംഘർഷം. വിവിധയിടങ്ങളിലുണ്ടായ ഏറ്റുമുട്ടലിൽ ഇതുവരെ 9 പേർ കൊല്ലപ്പെട്ടു. കൊല്ലപ്പെട്ടവരിൽ അഞ്ച് ടിഎംസി അംഗങ്ങളും ബിജെപി, സിപിഎം, കോൺഗ്രസ് പാർട്ടിയിലെ ഓരോ പ്രവർത്തകനും ഒരു സ്വതന്ത്ര സ്ഥാനാർഥിയുടെ അനുയായിയും ഉൾപ്പെടുന്നുണ്ട്.

## Article Content

**കൊൽക്കത്ത**: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് നടക്കുന്ന ബംഗാളിൽ വ്യാപക സംഘർഷം. വിവിധയിടങ്ങളിലുണ്ടായ ഏറ്റുമുട്ടലിൽ ഇതുവരെ 9 പേർ കൊല്ലപ്പെട്ടു. കൊല്ലപ്പെട്ടവരിൽ അഞ്ച് ടിഎംസി അംഗങ്ങളും ബിജെപി, സിപിഎം, കോൺഗ്രസ് പാർട്ടിയിലെ ഓരോ പ്രവർത്തകനും ഒരു സ്വതന്ത്ര സ്ഥാനാർഥിയുടെ അനുയായിയും ഉൾപ്പെടുന്നുണ്ട്.

അക്രമത്തിൽ നിരവധി പേർക്ക് പരിക്കേറ്റു. ഇവരെ വിവിധ ആശുപത്രികളിൽ പ്രവേശിപ്പിച്ചു. രണ്ട് പോളിങ് ബൂത്തുകളിലെ ബാലറ്റ് പെട്ടികൾ നശിപ്പിക്കപ്പെട്ടു. ബാലറ്റ് പേപ്പറുകൾക്ക് തീയിട്ടതായും റിപ്പോർട്ടുകൾ പുറത്തുവരുന്നുണ്ട്. പാർട്ടി പ്രവർത്തകരെ തട്ടിക്കൊണ്ട് പോയതായും റിപ്പോർട്ടുകളുണ്ട്. കൂച്ച് ബിഹാറിൽ ബിജെപിയുടെ പോളിങ് ഏജൻ്റ് വെടിയേറ്റ് മരിച്ചു. സംഘർഷത്തിൽ ഗുരുതരമായി പരിക്കേറ്റ സിപിഎം പ്രവർത്തകൻ ആശുപത്രിയിൽ വെച്ചാണ് മരിച്ചത്.

നാദിയ ജില്ലയിലെ ചപ്രയിൽ കോൺഗ്രസ് പ്രവർത്തകരുമായുണ്ടായ ഏറ്റുമുട്ടലിൽ ഒരു തൃണമൂൽ കോൺഗ്രസ് പ്രവർത്തകൻ കൊല്ലപ്പെട്ടു. ഇന്ന് രാവിലെ ഏഴുമണിക്ക് വോട്ടെടുപ്പ് ആരംഭിച്ചപ്പോൾ കൂച്ച് ബിഹാറിലും മാൾഡയിലും സംഘർഷം ആരംഭിച്ചിരുന്നു. ഈ പ്രദേശങ്ങളിലാണ് ഒരു ബിജെപി പ്രവർത്തകനും തൃണമൂൽ കോൺഗ്രസ് പ്രവർത്തകനും കൊല്ലപ്പെട്ടത്. നോർത്ത് 24 പർഗാനാസിലെ കദംബഗച്ചിയിൽ നടന്ന ഏറ്റുമുട്ടലിൽ ഒരു സ്വതന്ത്ര സ്ഥാനാർഥിയുടെ അനുയായിക്ക് ഗുരുതരമായി പരിക്കേറ്റു.

റെജിനഗർ, തുഫംഗഞ്ച്, ഖാർഗ്രാം എന്നിവിടങ്ങളിൽ തങ്ങളുടെ മൂന്ന് പാർട്ടി പ്രവർത്തകർ കൊല്ലപ്പെട്ടതായും വെടിയേറ്റ് രണ്ട് പേർക്ക് പരിക്കേറ്റതായും തൃണമൂൽ കോൺഗ്രസ് ആരോപിച്ചു. മുർഷിദാബാദിൽ കോൺഗ്രസും തൃണമൂൽ കോൺഗ്രസ് പ്രവർത്തകൻ കൊല്ലപ്പെട്ടു.

സംഘർഷസാധ്യത മുന്നിൽ കണ്ട് സംസ്ഥാന പോലീസിനെ കൂടാതെ 65,000 കേന്ദ്ര സേനാംഗങ്ങളെ തെരഞ്ഞെടുപ്പിന് സുരക്ഷയൊരുക്കാൻ നിയോഗിച്ചിരുന്നുവെങ്കിലും ഫലം കാണുന്നില്ലെന്നാണ് നിലവിലെ സാഹചര്യം വ്യക്തമാക്കുന്നത്. ലോക്സഭാ തെരഞ്ഞെടുപ്പിന് മാസങ്ങൾ മാത്രം അവശേഷിക്കുന്നതിനാൽ തദ്ദേശസ്ഥാപനങ്ങളിലേക്കുള്ള തെരഞ്ഞെടുപ്പിനെ അതീവ ഗൗരവത്തോടെയാണ് പാർട്ടികൾ കാണുന്നത്. ഇതാണ് സംഘർഷസാധ്യത വർധിപ്പിക്കുന്നത്.

### Related Links & Sources
- [Original Story Source](https://malayorashabdam.truevisionnews.com/news/128576/bengal-election-peoples-died)