തിരുവനന്തപുരം: സംസ്ഥാനത്ത് ഒറ്റപ്പെട്ട ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇതിന്റെ അടിസ്ഥാനത്തില് ഇടുക്കിയില് ഇന്ന് ഓറഞ്ച് അലര്ട്ട് പ്രഖ്യാപിച്ചു.പത്ത് ജില്ലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, കോട്ടയം, എറണാകുളം, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട് എന്നീ ജില്ലകളിലാണ് യെല്ലോ അലര്ട്ട് പ്രഖ്യാപിച്ചിരിക്കുന്നത്.
ശ്രീലങ്കന് തീരത്തിന് സമീപം നിലനില്ക്കുന്ന ചക്രവാതച്ചുഴി നാളെ അറബിക്കടലില് പ്രവേശിക്കാന് സാധ്യതയെന്ന് കേന്ദ്ര കാലാവസ്ഥ നിരീക്ഷണ കേന്ദ്രം അറിയിച്ചു. ഇതിന്റെ സ്വാധീനത്താല് കേരളത്തില് വരും ദിവസങ്ങളില് ശക്തമായ മഴയ്ക്ക് സാധ്യതയെന്നും കാലാവസ്ഥ വകുപ്പ് മുന്നറിയിപ്പ് നല്കി. മലയോര പ്രദേശങ്ങള്ക്കും തീരപ്രദേശങ്ങള്ക്കും കാലാവസ്ഥ വകുപ്പ് ജാഗ്രത നിര്ദ്ദേശം നല്കി.
അതേസമയം, ബംഗാള് ഉള്ക്കടലില് ആന്ഡമാന് കടലിലായി പുതിയ ന്യൂനമര്ദ്ദം രൂപപ്പെട്ട് കൂടുതല് ശക്തി പ്രാപിച്ച് ഇന്ത്യന് തീരത്തേയ്ക്ക് നീങ്ങുമെന്ന് കാലാവസ്ഥ വകുപ്പ് പ്രവചിച്ചു. ന്യൂനമര്ദ്ദത്തിന്റെ സ്വാധീനത്താല് ബംഗാള് ഉള്ക്കടല്, തെക്കന് തമിഴ്നാട് തീരം, കന്യാകുമാരി എന്നിവിടങ്ങളില് ശക്തമായ കാറ്റിന് സാധ്യതയുണ്ട്. കര്ണാടക തീരങ്ങളില് മത്സ്യബന്ധനത്തിന് തടസമില്ലെന്നും കാലാവസ്ഥ വകുപ്പ് അറിയിച്ചു.
Rain update kerala nov 28