---
title: "ഉളിയത്ത് കടവ് തുറന്ന് നൽകണം; പൊതുജനങ്ങൾ"
english_title: "Uliyath kadav "
publisher: "malayorashabdam.in"
canonical_url: "https://malayorashabdam.truevisionnews.com/news/14209/uliyath-kadav"
published_at: "2021-12-03T15:02:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/61a9e46a0097b_PicsArt_12-03-03.04.11.jpg"
keywords: []
---

# ഉളിയത്ത് കടവ് തുറന്ന് നൽകണം; പൊതുജനങ്ങൾ

> **Lead Summary:** കൊവിഡിൻ്റെ പേരിൽ അടച്ചിട്ട ചരിത്ര സ്മാരകം വീണ്ടും സന്ദർശകർക്കായി തുറന്ന് കൊടുക്കണമെന്നാണ് പൊതുജനാഭിപ്രായം ദണ്ഡിയാത്ര നടത്തി ഗാന്ധിജി ഉപ്പുകുറുക്കി നിയമം ലംഘിച്ചതിന്റെ തുടർച്ചയായി കേരളത്തിൽ ആദ്യമായി ഉപ്പുകുറുക്കൽ സമരം നടന്ന സ്ഥലമാണ് പയ്യന്നൂരിലെ ഉളിയത്തുകടവ്.

## Article Content

കൊവിഡിൻ്റെ പേരിൽ അടച്ചിട്ട ചരിത്ര സ്മാരകം വീണ്ടും സന്ദർശകർക്കായി തുറന്ന് കൊടുക്കണമെന്നാണ് പൊതുജനാഭിപ്രായം ദണ്ഡിയാത്ര നടത്തി ഗാന്ധിജി ഉപ്പുകുറുക്കി നിയമം ലംഘിച്ചതിന്റെ തുടർച്ചയായി കേരളത്തിൽ ആദ്യമായി ഉപ്പുകുറുക്കൽ സമരം നടന്ന സ്ഥലമാണ് പയ്യന്നൂരിലെ ഉളിയത്തുകടവ്.

> ഇന്ത്യൻ സ്വാതന്ത്ര്യസമര പ്രസ്ഥാനത്തിൽ പയ്യന്നൂരിലെ ഉളിയത്തുകടവ് ഐതിഹാസിക സമര പോരാട്ടത്തിന്റെ കർമഭൂമിയാണ്‌. സാമ്രാജ്യത്വവാഴ്ചയെ സമാധാനപൂർവം എതിരിട്ട “രണ്ടാം ബർദോളി’ എന്നാണ് അറിയപ്പെടുന്നത്. 1920 ഓടെ പയ്യന്നൂർ ദേശീയപ്രസ്ഥാനത്തിന്റെ കനൽ ഏറ്റുവാങ്ങുമ്പോൾ ഇവിടെ വച്ചാണ് കെ കേളപ്പന്റെ നേതൃത്വത്തിലുള്ള സംഘം ഉപ്പുകുറുക്കി ബ്രിട്ടീഷ് നിയമം ലംഘിച്ചത്. ദണ്ഡിയാത്ര നടത്തി ഗാന്ധിജി ഉപ്പുകുറുക്കി നിയമം ലംഘിച്ചതിന്റെ തുടർച്ചയായാണ്‌ കേരളത്തിൽ ആദ്യമായി പയ്യന്നൂരിൽ ഉപ്പുകുറുക്കൽ സമരം നടക്കുന്നത്‌.

നിയമലംഘന പ്രസ്ഥാനം ആരംഭിക്കുന്നതിന്റെ ഭാഗമായി കെ.കേളപ്പൻ, മൊയാരത്ത് ശങ്കരൻ, സി.എച്ച് ഗോവിന്ദൻ നമ്പ്യാർ എന്നിവരുടെ നേതൃത്വത്തിലായിരുന്നു സമരം തീരുമാനിച്ചത്. 1930 മാർച്ച് ഒമ്പതിന് വടകരയിൽ ചേർന്ന കെപിസിസി യോഗം ഇതിന് അനുമതി നൽകിയതോടെ 32 അംഗങ്ങളുള്ള ജാഥ കെ. കേളപ്പൻ ലീഡറായും, കെ.ടി കുഞ്ഞിരാമൻ നമ്പ്യാർ ക്യാപ്റ്റനുമായി പയ്യന്നൂരിലേക്ക് തിരിച്ചു. മൊയാരത്ത് കുഞ്ഞിശങ്കരമേനോൻ, പി.കുമാരൻ, സി.എച്ച് ഗോവിന്ദൻ എന്നിവരുടെ നേതൃത്വത്തിൽ വഴിയിൽ വരവേൽപ്പുകൾ ഏറ്റുവാങ്ങിക്കൊണ്ട് 22 ന് പയ്യന്നൂരിൽ ജാഥ എത്തുന്നു. പിറ്റേന്ന് ഉളിയത്ത് കടവിലേക്ക് ജാഥ വരികയും, മുദ്രാവാക്യം വിളിയും ദേശീയഗാനങ്ങളും അലയടിച്ച അന്തരീക്ഷത്തിൽ  ഉപ്പുകുറുക്കി നിയമം ലംഘിക്കുകയും ചെയ്യുന്നു. ഇതോടെ ഉളിയത്ത് കടവ് സ്വാതന്ത്ര്യസമരചരിത്രത്തിലെ സുവർണഭൂമിയായി അടയാളപ്പെടുന്നു. ഈ പറഞ്ഞത് ചരിത്രം. ഇപ്പോൾ പക്ഷെ ഉളിയത്ത് കടവിൽ പോകുന്നവരെ കാത്തിരിക്കുന്നത് ഈ ചരിത്ര കഥയല്ല, മറിച്ച് അവഗണനയുടെ ഏറ്റവും വലിയ പ്രതിരൂപമായി നിലകൊള്ളുന്ന ഒരു ചരിത്ര അടയാളമാണ്. കോവിഡിന്റെ സാഹചര്യത്തിൽ ആയിരുന്നു ആദ്യമായി കടവ് അടച്ചിടുന്നത്. അതിന് മുമ്പ് വരെ ചരിത്ര വിദ്യാർത്ഥികളും നിരീക്ഷകരുമായി നിരവധിയാളുകൾ ദിവസേന വന്ന് പോയിരുന്നു. നഗരസഭ കടവ് പൂട്ടി താക്കോലും കൊണ്ട് പോയതോടെ സാമൂഹ്യ വിരുദ്ധരുടെയും മദ്യപാനികളുടേയും വിഹാരകേന്ദ്രമായി ഇവിടം മാറി എന്നാണ് നാട്ടുകാരും, സാമൂഹ്യ പ്രവർത്തകരും അഭിപ്രായപ്പെടുന്നത്. കാട് കയറുകയും ചവറുകൾ വീഴുകയും കൂടി ആയതോടെ കടവിന്റെ ഭംഗി പൂർണ്ണമായും ഇല്ലാതായി. പ്ലാസ്റ്റിക് മാലിന്യങ്ങൾ കുപ്പികൾ എന്നിവ ഇവിടെ കൊണ്ട് ചെന്ന് വലിചെറിയുന്നവരും ചെറുതല്ല. 

കോവിഡ് വ്യാപനം കുറഞ്ഞ സാഹചര്യത്തിൽ, മറ്റെല്ലാ സ്ഥാപനങ്ങൾക്കും തുറന്ന് പ്രവർത്തിക്കാനും പഴയ പടി കാര്യങ്ങൾ മുന്നോട്ട് കൊണ്ട് പോകാനുമുള്ള അനുമതി സർക്കാർ നൽകിയിട്ടുണ്ട്. എന്നാൽ ഇതുവരെയും ഉളിയത്ത് കടവിന്റെ താഴു തുറന്നിട്ടില്ല. അത് കൊണ്ട് തന്നെ എത്രയും പെട്ടെന്ന് ഉളിയത്ത് കടവ് വിദ്യാർത്ഥികൾക്കും മറ്റുള്ളവർക്കുമായി തുറന്ന് നൽകി വൃത്തിയായി സൂക്ഷിച്ചു മുന്നോട്ട് കൊണ്ട് പോണം എന്നാണ് നാട്ടുകാരുടെ അഭിപ്രായം. ഇത്രയും പ്രാധാന്യമുള്ള ഒരു ചരിത്ര സ്മാരകത്തെ ഇത്തരത്തിൽ അവഗണിക്കുന്നത് ശെരിയല്ല എന്നും, അത് ഇന്ത്യൻ സ്വതന്ത്രസമരത്തോട് തന്നെ കാണിക്കുന്ന അവഗണനയാണ് എന്നുമാണ് ഇവർ ചൂണ്ടിക്കാണിക്കുന്നത്.

### Related Links & Sources
- [Original Story Source](https://malayorashabdam.truevisionnews.com/news/14209/uliyath-kadav)