---
title: "പ്ലാസ്റ്റിക് ഫ്രീ കണ്ണൂര്‍; ഡിസംബര്‍ 21 മുതല്‍ ബദല്‍ ഉല്‍പ്പന്ന പ്രദര്‍ശന മേള"
english_title: "Plastic free kannur mela from dec 21"
publisher: "malayorashabdam.in"
canonical_url: "https://malayorashabdam.truevisionnews.com/news/16275/plastic-free-kannur-mela-from-dec-21"
published_at: "2021-12-16T07:40:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/61baa052e9761_images - 2021-12-16T074124.547.jpeg"
keywords: []
---

# പ്ലാസ്റ്റിക് ഫ്രീ കണ്ണൂര്‍; ഡിസംബര്‍ 21 മുതല്‍ ബദല്‍ ഉല്‍പ്പന്ന പ്രദര്‍ശന മേള

> **Lead Summary:** കണ്ണൂര്‍ :ജില്ലയെ ഒറ്റത്തവണ പ്ലാസ്റ്റിക് മുക്തമാക്കുന്നതിന്റെ ഭാഗമായി ഡിസംബര്‍ 21 മുതല്‍ 31 വരെ ജില്ലാതല ബദല്‍ ഉല്‍പ്പന്ന പ്രദര്‍ശന മേള സംഘടിപ്പിക്കും.

## Article Content

കണ്ണൂര്‍ :ജില്ലയെ ഒറ്റത്തവണ പ്ലാസ്റ്റിക് മുക്തമാക്കുന്നതിന്റെ ഭാഗമായി ഡിസംബര്‍ 21 മുതല്‍ 31 വരെ ജില്ലാതല ബദല്‍ ഉല്‍പ്പന്ന പ്രദര്‍ശന മേള സംഘടിപ്പിക്കും.

ജില്ലാ കലക്ടര്‍ എസ് ചന്ദ്രശേഖറിന്റെ അധ്യക്ഷതയില്‍ നടന്ന അവലോകന യോഗത്തിലാണ് തീരുമാനം. ബദല്‍ ഉല്‍പ്പന്ന പ്രദര്‍ശന മേളക്കാവശ്യമായ ഫണ്ട് ശുചിത്വമിഷന്റെ ഐ ഇ സി ഫണ്ടില്‍ നിന്നും കണ്ടെത്താന്‍ ജില്ലാ കലക്ടര്‍ നിര്‍ദ്ദേശിച്ചു. പ്രവര്‍ത്തനങ്ങള്‍ അവലോകനം ചെയ്യുന്നതിനായി ഗ്രാമപഞ്ചായത്ത് പ്രസിഡണ്ടുമാരുടെയും സെക്രട്ടറിമാരുടെയും ഓണ്‍ലൈന്‍ യോഗം ഡിസംബര്‍ 17 ഉച്ചക്ക് രണ്ട് മണിക്ക് ചേരും.

2021 ജനുവരി ഒന്നിന് ജില്ലയിലെ എല്ലാ വിദ്യാലയങ്ങളിലും ശുചിത്വ പ്രതിജ്ഞ ചൊല്ലല്‍ സംഘടിപ്പിക്കും. ഇതിനായി വിദ്യാഭ്യാസ ഓഫീസര്‍മാരുടെ യോഗം വിളിച്ചു ചേര്‍ക്കും.

പ്ലാസ്റ്റിക് ഫ്രീ കണ്ണൂര്‍ പദ്ധതി നടത്തിപ്പുമായി ബന്ധപ്പെട്ട് നഗരസഭ, ബ്ലോക്ക് പഞ്ചായത്ത് അധ്യക്ഷന്മാര്‍,സെക്രട്ടറിമാര്‍, ആരോഗ്യ കാര്യ സ്ഥിരം സമിതി അധ്യക്ഷന്മാര്‍, ഹെല്‍ത്ത് ഇന്‍സ്‌പെക്ടര്‍മാര്‍ എന്നിവരുടെ ഓണ്‍ലൈന്‍ യോഗം ഡിസംബര്‍ 22 ന് രാവിലെ 10.30 ന് ജില്ലാ കലക്ടറുടെ അധ്യക്ഷതയില്‍ ചേരും. തദ്ദേശ സ്ഥാപനങ്ങളില്‍ മാലിന്യം തള്ളുന്നത് തടയുന്നതിന് സി സി ടി വി സ്ഥാപിക്കുന്നതുമായി ബന്ധപ്പെട്ട് വിശദമായ റിപ്പോര്‍ട്ട് സമര്‍പ്പിക്കാന്‍ ഹരിത കേരളം മിഷന്‍ ജില്ലാ കോ-ഓഡിനേറ്ററെ ചുമതലപ്പെടുത്തി.

കലക്ടറേറ്റ് ചേംബറില്‍ നടന്ന യോഗത്തില്‍ ഹരിത കേരളം മിഷന്‍ ജില്ലാ കോ-ഓഡിനേറ്റര്‍ ഇ കെ സോമശേഖരന്‍, അസി. പ്ലാനിങ് ഓഫീസര്‍ പി വി അനില്‍, ശുചിത്വമിഷന്‍ അസി. കോ ഓഡിനേറ്റര്‍ കെ ആര്‍ അജയകുമാര്‍, ഡിടിപിസി സെക്രട്ടറി ജെ കെ ജിജേഷ് കുമാര്‍ വിവിധ വകുപ്പ് പ്രതിനിധികള്‍ തുടങ്ങിയവര്‍ പങ്കെടുത്തു.

### Related Links & Sources
- [Original Story Source](https://malayorashabdam.truevisionnews.com/news/16275/plastic-free-kannur-mela-from-dec-21)