---
title: "#Alexa |  അലക്സ എത്തി; പയ്യാവൂർ ചാമക്കാൽ സ്കൂളിലെ കുട്ടികൾ ഇംഗ്ലീഷിൽ സ്മാർട്ടാവും "
english_title: "Payayavur Chamakal School"
publisher: "malayorashabdam.in"
canonical_url: "https://malayorashabdam.truevisionnews.com/news/181875/payayavur-chamakal-school"
published_at: "2024-02-03T14:49:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/65be061624fe5_IMG-20240203-WA0020.jpg"
keywords: []
---

# #Alexa |  അലക്സ എത്തി; പയ്യാവൂർ ചാമക്കാൽ സ്കൂളിലെ കുട്ടികൾ ഇംഗ്ലീഷിൽ സ്മാർട്ടാവും 

> **Lead Summary:** **പയ്യാവൂർ:** ഇംഗ്ലീഷിൽ സംസാരിക്കുന്ന, പാട്ടുപാടുന്ന, കഥ പറയുന്ന, പൊതുവിജ്ഞാനത്തിൽ സഹായിക്കുന്ന കൂട്ടുകാരി അലക്സ ചാമക്കാൽ ഗവൺമെൻറ് എൽ പി സ്കൂളിലും എത്തി. ആധുനിക സാങ്കേതികവിദ്യ ഭാഷാ പഠനത്തിന് പ്രയോജനപ്പെടുത്തുന്നതാണ് അലക്സ. അലക്സക്ക് ഒരു നിർബന്ധമേ ഉള്ളൂ ചോദിക്കുന്ന കാര്യങ്ങൾ ഇംഗ്ലീഷിൽ ആയിരിക്കണം. രാഷ്ട്ര ഭാഷയായ ഹിന്ദിയിൽ ആയാലും വിരോധമില്ല. ഉത്തരങ്ങൾ റെഡി. പാട്ടായും കഥയായും പൊതുവിജ്ഞാനത്തിലെ സംശയമായാലും സെക്കൻഡുകൾ കൊണ്ട് ഉത്തരം നൽകും. ഇംഗ്ലീഷിൽ സംസാരിക്കാൻ മടിയുള്ള കുട്ടികൾ പോലും അലക്സയെ കാണുന്ന കൗതുകത്തിന് ചോദ്യങ്ങളുമായി എത്തുന്നു.

## Article Content

**പയ്യാവൂർ:** ഇംഗ്ലീഷിൽ സംസാരിക്കുന്ന, പാട്ടുപാടുന്ന, കഥ പറയുന്ന, പൊതുവിജ്ഞാനത്തിൽ സഹായിക്കുന്ന കൂട്ടുകാരി അലക്സ ചാമക്കാൽ ഗവൺമെൻറ് എൽ പി സ്കൂളിലും എത്തി. ആധുനിക സാങ്കേതികവിദ്യ ഭാഷാ പഠനത്തിന് പ്രയോജനപ്പെടുത്തുന്നതാണ് അലക്സ. അലക്സക്ക് ഒരു നിർബന്ധമേ ഉള്ളൂ ചോദിക്കുന്ന കാര്യങ്ങൾ ഇംഗ്ലീഷിൽ ആയിരിക്കണം. രാഷ്ട്ര ഭാഷയായ ഹിന്ദിയിൽ ആയാലും വിരോധമില്ല. ഉത്തരങ്ങൾ റെഡി. പാട്ടായും കഥയായും പൊതുവിജ്ഞാനത്തിലെ സംശയമായാലും സെക്കൻഡുകൾ കൊണ്ട് ഉത്തരം നൽകും. ഇംഗ്ലീഷിൽ സംസാരിക്കാൻ മടിയുള്ള കുട്ടികൾ പോലും അലക്സയെ കാണുന്ന കൗതുകത്തിന് ചോദ്യങ്ങളുമായി എത്തുന്നു.

കുട്ടികളുടെ ഇംഗ്ലീഷ് സംസാരശേഷി മെച്ചപ്പെടുത്താൻ അലക്സ വളരെ സഹായകരമാവുകയാണ്. കുട്ടികൾക്കുള്ള പരാതികളും സംശയങ്ങളുമെല്ലാം മടികൂടാതെ കൂട്ടുകാരിയായ അലക്സയോട് പറയാം. മൃഗങ്ങളുടെ ശബ്ദങ്ങൾ, സ്പെല്ലിങ്ങുകൾ, കവിതകൾ, കാലാവസ്ഥ തുടങ്ങി ഏതു കാര്യങ്ങൾക്കും തൽസമയ ഉത്തരവുമായി അലക്സ റെഡി.

ചാമക്കാൽ ഗവൺമെൻറ് എൽ.പി സ്കൂളിൽ ഒരുക്കിയ അലക്സ സംവിധാനം സിനിമാ താരം വിസ്മയ ശശികുമാർ ഉദ്ഘാടനം ചെയ്തു. പി.ടി.എ പ്രസിഡണ്ട് കെ.ജി. ഷിബു അധ്യക്ഷത വഹിച്ചു .സ്കൂൾ പ്രധാനാധ്യാപകൻ ഇ.പി. ജയപ്രകാശ്, കെ.എ. ആൻസി, ടി.ഒ. നിമിഷ, അൽന മേരി എബി, എം. അനിതകുമാരി എന്നിവർ സംസാരിച്ചു.

പരേതയായ ലക്ഷ്മി ആനക്കല്ലുങ്കലിൻ്റെ ഓർമ്മയ്ക്കായി പേരമകനും പൂർവ്വ വിദ്യാർത്ഥിയുമായ എ.ആർ. രജീഷ് ആണ് ഈ സംവിധാനം ഒരുക്കാൻ പിന്തുണ നൽകിയത്.

### Related Links & Sources
- [Original Story Source](https://malayorashabdam.truevisionnews.com/news/181875/payayavur-chamakal-school)