---
title: "കോഹ്‍ലിയുടെ മെല്ലെപ്പോക്ക് വിനയായി; രാജസ്ഥാന് നാലാം വിജയം"
english_title: "Rr rcb "
publisher: "malayorashabdam.in"
canonical_url: "https://malayorashabdam.truevisionnews.com/news/197238/rr-rcb"
published_at: "2024-04-06T23:18:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/66118bb169809_n5980988601712425396087b7e00c8e241c43881fa6cfb551200c20402c11273da115d9d5bc3f1ea28361c0.jpg"
keywords: []
---

# കോഹ്‍ലിയുടെ മെല്ലെപ്പോക്ക് വിനയായി; രാജസ്ഥാന് നാലാം വിജയം

> **Lead Summary:** സഞ്ജു സാംസന്റെയും ജോസ് ബട്ലറുടെയും മികവില്‍ രാജസ്ഥാൻ റോയല്‍സ് ആർ സി ബിയെ തോല്‍പ്പിച്ചു‌. രാജസ്ഥാൻ റോയല്‍സിന്റെ തുടർച്ചയായ നാലാം വിജയമാണിത്. 6 വിക്കറ്റ് വിജയമാണ് രാജസ്ഥാൻ ഇന്ന് നേടിയത്. ഈ വിജയത്തോടെ രാജസ്ഥാൻ റോയല്‍ ലീഗ് ടേബിളില്‍ ഒന്നാം സ്ഥാനത്തും എത്തി.

## Article Content

സഞ്ജു സാംസന്റെയും ജോസ് ബട്ലറുടെയും മികവില്‍ രാജസ്ഥാൻ റോയല്‍സ് ആർ സി ബിയെ തോല്‍പ്പിച്ചു‌. രാജസ്ഥാൻ റോയല്‍സിന്റെ തുടർച്ചയായ നാലാം വിജയമാണിത്. 6 വിക്കറ്റ് വിജയമാണ് രാജസ്ഥാൻ ഇന്ന് നേടിയത്. ഈ വിജയത്തോടെ രാജസ്ഥാൻ റോയല്‍ ലീഗ് ടേബിളില്‍ ഒന്നാം സ്ഥാനത്തും എത്തി.

രാജസ്ഥാൻ റോയല്‍സിന്റെ ചെയ്സ് അത്ര നല്ല രീതിയില്‍ അല്ല തുടങ്ങിയത്. അവർക്ക് തുടക്കത്തില്‍ തന്നെ ജയ്സ്വാളിനെ നഷ്ടമായി. ജയ്സ്വാള്‍ റണ്‍ ഒന്നും എടുത്തില്ല. ഈ സീസണ ഇതുവരെ ജയ്സ്വാളിന് ഫോം കണ്ടെത്താൻ ആയിട്ടില്ല. ഇതിനു ശേഷം സഞ്ജു സാംസണും ജോസ് ബട്ലറും ഒരുമിച്ചു. ഇരുവരും നല്ല രീതിയില്‍ കൂട്ടുകെട്ട് പടുത്തു‌.

മായങ്ക് ദാഗറിന്റെ ഒരു ഓവറില്‍ 20 റണ്‍സ് അടിച്ച്‌ കൊണ്ട് ബട്ലർ റണ്‍ റേറ്റ് ഉയർത്താൻ രാജസ്ഥാനെ സഹായിച്ചു. ബട്ലർ 30 പന്തില്‍ നിന്ന് 50ല്‍ എത്തി. അദ്ദേഹത്തിന്റെ ഇരുപതാം ഐ പി എല്‍ അർധ സെഞ്ച്വറി ആയിരുന്നു ഇത്. ഇതിനു പിന്നാലെ സഞ്ജുവും അർധ സെഞ്ച്വറിയില്‍ എത്തി. സഞ്ജുവിന്റെ സീസണിലെ രണ്ടാം അർധ സെഞ്ച്വറിയായി ഇത്.

അവസാന 8 ഓവറില്‍ 60 റണ്‍സ് മാത്രമെ രാജസ്ഥാന് വേണ്ടിയിരുന്നുള്ളൂ. സഞ്ജു സാംസണ്‍ 42 പന്തില്‍ നിന്ന് 69 റണ്‍സ് എടുത്താണ് പുറത്തായത്. 8 ഫോറും സിക്സും സഞ്ജു അടിച്ചു. സഞ്ജു ഔട്ട് ആകുമ്ബോള്‍ രാജസ്ഥാന് 32 പന്തില്‍ 36 റണ്‍സ് ആയിരുന്നു വേണ്ടിയിരുന്നത്. സഞ്ജു ഔട്ടായപ്പോള്‍ റയാൻ പരാഗ് ബട്ലറിനൊപ്പം ചേർന്നു.

പരാഗ് പക്ഷെ 3 പന്തില്‍ 4 റണ്‍ എടുത്ത് പുറത്തായത് രാജസ്ഥാനെ സമ്മർദ്ദത്തിലാക്കി. ബട്ലർ ക്രീസില്‍ ഉള്ളത് അവർക്ക് ധൈര്യം നല്‍കി. അവസാന 4 ഓവറില്‍ 24 റണ്‍സിലേക്ക് അവരുടെ ടാർഗറ്റ് കുറഞ്ഞു. 17ആം ഓവറില്‍ ജുറല്‍ 3 പന്തില്‍ നിന്ന് 2 റണ്‍ എടുത്തു പുറത്തായി. അവസാന 3 ഓവറില്‍ 14 റണ്‍സ് മാത്രനെ രാജസ്ഥാന് ജയിക്കാൻ വേൻടിയിരുന്നുള്ളൂ. ബട്ലറും ഹെറ്റ്മയറും കൂടെ അനായാസം അവരെ ലക്ഷ്യത്തില്‍ എത്തിച്ചു.

ബട്ലർ 58 പന്തില്‍ നിന്ന് 100 റണ്‍സ് എടുത്ത് പുറത്താകാതെ നിന്നു. 5 സിക്സും 9 ഫോറും ബട്ലർ അടിച്ചു.സിക്സ് അടിച്ച്‌ 100 പൂർത്തിയാക്കിയാണ് ബട്ലർ രാജസ്ഥാനെ ജയത്തില്‍ എത്തിച്ചത്.

ഇന്ന് ആദ്യം ബാറ്റു ചെയ്ത ആർ സി ബി 183/3 എന്ന സ്കോര്‍ ആണ് ഉയർത്തിയത്. ഒരു ഘട്ടത്തില്‍ വിരാട് കോഹ്‍ലിയും ഫാഫ് ഡു പ്ലെസിയും നല്‍കിയ തുടക്കത്തിന് ശേഷം ആര്‍സിബി 200ന് മേലെയുള്ള സ്കോര്‍ ഉറപ്പായും നേടുമെന്ന തോന്നിപ്പിച്ചുവെങ്കിലും അവസാനം ആഞ്ഞടിക്കാൻ ആർ സി ബിക്ക് ആയില്ല.

മികച്ച തുടക്കാണ് ആര്‍സിബി ഓപ്പണര്‍മാര്‍ ടീമിന് നല്‍കിയത്. പവര്‍പ്ലേയില്‍ 53 റണ്‍സ് നേടിയ ഈ കൂട്ടുകെട്ട് പത്തോവര്‍ പിന്നിടുമ്ബോള്‍ 88 റണ്‍സാണ് നേടിയത്. 14 ഓവറില്‍ 125 റണ്‍സാണ് വിരാട് കോഹ്‍ലി - ഫാഫ് ഡു പ്ലെസി കൂട്ടുകെട്ട് നേടിയത്. 33 പന്തില്‍ 44 റണ്‍സ് നേടി ഫാഫ് ഡു പ്ലെസിയുടെ വിക്കറ്റ് ചഹാല്‍ ആണ് നേടിയത്.

തൊട്ടടുത്ത ഓവറില്‍ നാന്‍ഡ്രേ ബര്‍ഗര്‍ ഗ്ലെന്‍ മാക്സ്വെല്ലിനെ പുറത്താക്കി. അരങ്ങേറ്റക്കാരന്‍ സൗരവ് ചൗഹാനെ പുറത്താക്കി ചഹാല്‍ തന്റെ രണ്ടാം വിക്കറ്റ് നേടിയപ്പോള്‍ 125/0 എന്ന നിലയില്‍ നിന്ന് 155/3 എന്ന നിലയിലേക്ക് ആര്‍സിബി വീണു.

നാന്‍ഡ്രേ ബര്‍ഗര്‍ 19ാം ഓവറില്‍ വെറും 4 റണ്‍സ് വിട്ട് നല്‍കിയപ്പോള്‍ അവസാന ഓവറില്‍ കോഹ്‍ലി നേടിയ 3 ബൗണ്ടറികളാണ് ആര്‍സിബിയെ 183 റണ്‍സിലേക്ക് എത്തിച്ചത്. കോഹ്‍ലി 72 പന്തില്‍ 113 റണ്‍സാണ് നേടിയത്.

### Related Links & Sources
- [Original Story Source](https://malayorashabdam.truevisionnews.com/news/197238/rr-rcb)