---
title: "ബാങ്കിൽ 80 ലക്ഷം ഡെപ്പോസിറ്റ്; ഇടപാടുകാരനെ കൊല്ലാൻ ബാങ്ക് മാനേജറുടെ കൊട്ടേഷൻ"
english_title: "A bank manager's quotation to kill the customer"
publisher: "malayorashabdam.in"
canonical_url: "https://malayorashabdam.truevisionnews.com/news/226548/a-bank-managers-quotation-to-kill-the-customer"
published_at: "2024-08-08T11:46:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/66b462f2160c7_saritha.jpg"
keywords: []
---

# ബാങ്കിൽ 80 ലക്ഷം ഡെപ്പോസിറ്റ്; ഇടപാടുകാരനെ കൊല്ലാൻ ബാങ്ക് മാനേജറുടെ കൊട്ടേഷൻ

> **Lead Summary:**  കൊല്ലം: ബാങ്കിൽ 80 ലക്ഷം ഡെപ്പോസിറ്റ് ചെയ്ത ഇടപാടുകാരൻ കൊല്ലപ്പെട്ടത് ബാങ്ക് മാനേജറുടെ കൊട്ടേഷൻ മൂലമെന്ന് കണ്ടെത്തൽ. കൊല്ലത്ത് കാറിടിച്ച് സൈക്കിള്‍ യാത്രക്കാരന്‍ മരിച്ച സംഭവമാണ് കൊലപാതകമാണെന്ന് പോലീസ് കണ്ടെത്തിയത്. ബിഎസ്എന്‍എല്‍ റിട്ടയേഡ് ഡിവിഷന്‍ എഞ്ചിനീയറായ സി പാപ്പച്ചന്‍ മെയ് 26 നാണ് മരിച്ചത്. അന്ന് സാധാരണ റോഡ് അപകടമെന്ന് വിശ്വസിച്ചിരുന്ന സംഭവം ആസൂത്രിത കൊലപാതകമായിരുന്നെന്ന് തെളിഞ്ഞു. സ്വകാര്യ ബാങ്ക് മാനേജറായിരുന്ന യുവതി പണം തട്ടിയെടുക്കാനായി ക്വട്ടേഷന്‍ നല്‍കുകയായിരുന്നുവെന്ന് പൊലീസ് പറഞ്ഞു. കൊല്ലം ഈസ്റ്റ് പൊലീസ് നടത്തിയ അന്വേഷണത്തിലാണ് കൊലപാതകത്തിന്റെ ചുരുളഴിഞ്ഞത്. സംഭവത്തിൽ വനിത ബാങ്ക് മാനേജർ സരിതയും മൂന്ന് കൂട്ടാളികളും അറസ്റ്റിലായി.

## Article Content

 കൊല്ലം: ബാങ്കിൽ 80 ലക്ഷം ഡെപ്പോസിറ്റ് ചെയ്ത ഇടപാടുകാരൻ കൊല്ലപ്പെട്ടത് ബാങ്ക് മാനേജറുടെ കൊട്ടേഷൻ മൂലമെന്ന് കണ്ടെത്തൽ. കൊല്ലത്ത് കാറിടിച്ച് സൈക്കിള്‍ യാത്രക്കാരന്‍ മരിച്ച സംഭവമാണ് കൊലപാതകമാണെന്ന് പോലീസ് കണ്ടെത്തിയത്. ബിഎസ്എന്‍എല്‍ റിട്ടയേഡ് ഡിവിഷന്‍ എഞ്ചിനീയറായ സി പാപ്പച്ചന്‍ മെയ് 26 നാണ് മരിച്ചത്. അന്ന് സാധാരണ റോഡ് അപകടമെന്ന് വിശ്വസിച്ചിരുന്ന സംഭവം ആസൂത്രിത കൊലപാതകമായിരുന്നെന്ന് തെളിഞ്ഞു. സ്വകാര്യ ബാങ്ക് മാനേജറായിരുന്ന യുവതി പണം തട്ടിയെടുക്കാനായി ക്വട്ടേഷന്‍ നല്‍കുകയായിരുന്നുവെന്ന് പൊലീസ് പറഞ്ഞു. കൊല്ലം ഈസ്റ്റ് പൊലീസ് നടത്തിയ അന്വേഷണത്തിലാണ് കൊലപാതകത്തിന്റെ ചുരുളഴിഞ്ഞത്. സംഭവത്തിൽ വനിത ബാങ്ക് മാനേജർ സരിതയും മൂന്ന് കൂട്ടാളികളും അറസ്റ്റിലായി.

പന്തളം കുടശ്ശനാട് സ്വദേശിയായ പാപ്പച്ചന്‍ കൊല്ലത്ത് ഒറ്റയ്ക്കാണ് താമസിച്ചിരുന്നത്. പാപ്പച്ചന് സ്വകാര്യ ബാങ്കില്‍ 80 ലക്ഷത്തിലേറെ രൂപയുടെ നിക്ഷേപമുണ്ടായിരുന്നു. ഈ പണം തട്ടിയെടുക്കാനായി ബാങ്ക് മാനേജരായ സരിത, മറ്റൊരു ബാങ്ക് ജീവനക്കാരന്‍, വേറെ രണ്ടുപേര്‍ എന്നിവര്‍ ചേര്‍ന്നാണ് പദ്ധതി ആസൂത്രണം ചെയ്തത്. സൈക്കിളില്‍ പോകുകയായിരുന്ന പാപ്പച്ചനെ കാറിടിച്ചു വീഴ്ത്തുകയായിരുന്നു. കാറിടിച്ച് സൈക്കിള്‍ യാത്രക്കാരന്‍ മരിച്ചു എന്നായിരുന്നു പൊലീസിന് ലഭിച്ച വിവരം. പൊലീസ് നടത്തിയ അന്വേഷണത്തില്‍ കാര്‍ ഓടിച്ചിരുന്ന അനിമോന്‍ എന്നയാളുടെ അറസ്റ്റ് രേഖപ്പെടുത്തി വിട്ടയച്ചിരുന്നു. എന്നാല്‍ പിന്നീട് അനിമോന്റെ ക്രിമിനല്‍ പശ്ചാത്തലം മനസ്സിലാക്കിയ പൊലീസ് നടത്തിയ അന്വേഷണത്തില്‍, ഇയാളുടെ ബാങ്ക് അക്കൗണ്ടിലേക്ക് വന്‍തുക എത്തിയത് കണ്ടെത്തുകയായിരുന്നു. തുടര്‍ന്നാണ് അനിമോന്‍ ക്വട്ടേഷന്‍ ഏറ്റെടുത്ത് നടത്തിയ കൊലപാതകമാണെന്ന് കണ്ടെടുത്തത്. പാപ്പച്ചന്റെ സ്വകാര്യ ബാങ്കിലുണ്ടായിരുന്ന പണം തട്ടിയെടുക്കുക ലക്ഷ്യമിട്ടാണ് വനിതാ ബാങ്ക് മാനേജരും കൂട്ടാളികളും കൊലപാതകം ആസൂത്രണം ചെയ്തത്.

ബാങ്കിലെ അക്കൗണ്ടിലുണ്ടായിരുന്ന 40 ലക്ഷം രൂപ നഷ്ടപ്പെട്ടത് പാപ്പച്ചന്‍ അറിയുകയും ചോദ്യം ചെയ്യുകയും ചെയ്തിരുന്നു. പ്രശ്‌നം പരിഹരിക്കാനായി കൊല്ലം ആശ്രാമം ഗസ്റ്റ് ഹൗസ് ഭാഗത്തേക്ക് എത്താൻ അറിയിക്കുകയും സൈക്കിളില്‍ പാപ്പച്ചന്‍ വരുമ്പോള്‍ കാറിടിച്ചു വീഴ്ത്തുകയും ആയിരുന്നു. അറസ്റ്റിലായവരിൽ ഒരാൾ ക്വട്ടേഷന്‍ ഏറ്റെടുത്ത അനിമോൻ ആണ്.

### Related Links & Sources
- [Original Story Source](https://malayorashabdam.truevisionnews.com/news/226548/a-bank-managers-quotation-to-kill-the-customer)