---
title: " ഒറ്റദിവസം 25 ലക്ഷം; റെക്കോഡ് കളക്‌ഷനുമായി കണ്ണൂർ കെ.എസ്.ആർ.ടി.സി"
english_title: "Ksrtc"
publisher: "malayorashabdam.in"
canonical_url: "https://malayorashabdam.truevisionnews.com/news/237902/ksrtc"
published_at: "2024-09-25T11:43:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/66f3aa2de05c1_IMG-20240925-WA0033.jpg"
keywords: []
---

#  ഒറ്റദിവസം 25 ലക്ഷം; റെക്കോഡ് കളക്‌ഷനുമായി കണ്ണൂർ കെ.എസ്.ആർ.ടി.സി

> **Lead Summary:**  **കണ്ണൂർ**: ഒറ്റദിവസംകൊണ്ട് 25 ലക്ഷത്തിനുമുകളിൽ വരുമാന നേട്ടവുമായി കെ.എസ്.ആർ.ടി.സി. കണ്ണൂർ യൂണിറ്റ്. കോർപ്പറേഷൻ നിശ്ചയിച്ച 21,50,000 എന്ന ലക്ഷ്യത്തെ മറികടന്ന് 25,02,210 തുക ടിക്കറ്റ് വരുമാനത്തിലൂടെ മാത്രം സ്വന്തമാക്കിയാണ് യൂണിറ്റിന്റെ നേട്ടം. തിങ്കളാഴ്ചയിലെ മാത്രം കളക്‌ഷനാണിത്.

## Article Content

 **കണ്ണൂർ**: ഒറ്റദിവസംകൊണ്ട് 25 ലക്ഷത്തിനുമുകളിൽ വരുമാന നേട്ടവുമായി കെ.എസ്.ആർ.ടി.സി. കണ്ണൂർ യൂണിറ്റ്. കോർപ്പറേഷൻ നിശ്ചയിച്ച 21,50,000 എന്ന ലക്ഷ്യത്തെ മറികടന്ന് 25,02,210 തുക ടിക്കറ്റ് വരുമാനത്തിലൂടെ മാത്രം സ്വന്തമാക്കിയാണ് യൂണിറ്റിന്റെ നേട്ടം. തിങ്കളാഴ്ചയിലെ മാത്രം കളക്‌ഷനാണിത്.

സംസ്ഥാനത്താകെ ഒറ്റദിവസംകൊണ്ട് ഒൻപത് കോടി കളക്‌ഷൻ നേടുക എന്ന ലക്ഷ്യമാണ് കോർപ്പറേഷൻ മുന്നോട്ടുവെച്ചിരുന്നത്. ഇതിൽ 8.65 ലക്ഷം നേടാനാണ് കോർപ്പറേഷന്‌ സാധിച്ചത്. മിക്ക യൂണിറ്റുകൾക്കും ലക്ഷ്യം കൈവരിക്കാൻ സാധിച്ചില്ല. അതേസമയം നേട്ടം കൈവരിച്ച യൂണിറ്റുകൾ കെ.എസ്.ആർ.ടി.സി.യ്ക്ക് അഭിമാനമായി. കളക്‌ഷനിൽ സംസ്ഥാനതലത്തിൽ ആറാമതാണ് കണ്ണൂർ യൂണിറ്റ്. ഒരു കിലോമീറ്ററിൽ നേടിയ വരുമാനം (ഏണിങ് പെർ കിലോമീറ്റർ -ഇ.കെ.പി.എം.), ഒരു ബസ് നേടിയ വരുമാനം (ഏണിങ് പെർ ബസ്-ഇ.പി.ബി.) എന്നിവയിലും ഒന്നാമതെത്തിയ കണ്ണൂർ യൂണിറ്റ് ഉത്തരമേഖലയിലെ ആകെ യൂണിറ്റുകളിലും ഒന്നാം സ്ഥാനത്തെത്തി. കാഞ്ഞങ്ങാട്, പെരിന്തൽമണ്ണ, മാനന്തവാടി, തൊട്ടിൽപ്പാലം, തിരുവമ്പാടി യൂണിറ്റുകളാണ് ഉത്തരമേഖലയിൽ കണ്ണൂരിനുപിന്നിൽ ലക്ഷ്യം കൈവരിച്ച മറ്റ്‌ യൂണിറ്റുകൾ. 14-ന് നേടിയ 22,87,000 കളക്‌ഷനാണ് ഇതിന് മുൻപ് കണ്ണൂർ യൂണിറ്റ് സ്വന്തമാക്കിയ ഏറ്റവും ഉയർന്ന കളക്‌ഷൻ. ഇതിനെയും മറികടന്നാണ് പുതിയ കളക്‌ഷനെന്നത് അഭിമാനമാണെന്നും ജീവനക്കാരുടെ പ്രയത്നത്തിന് ലഭിച്ച അംഗീകാരമാണെന്നും കണ്ണൂർ യൂണിറ്റിന് നേതൃത്വംനല്കുന്ന ഡി.ടി.ഒ. വി. മനോജ്‌കുമാർ, പി. ഗിരീഷ് കുമാർ എന്നിവർ അറിയിച്ചു.

### Related Links & Sources
- [Original Story Source](https://malayorashabdam.truevisionnews.com/news/237902/ksrtc)