ഇരിട്ടി : ആറളം ഫാം പുനരധിവാസ മേഖലയിൽ ബ്ലോക്ക് 9 ൽ കാട്ടാന വീടിന്റെ അടുക്കള ഷെഡ് തകർത്തു . ബ്ലോക്ക് 9 ൽ വളയംചാലിലെ രാജൻ- ബിന്ദു ദമ്പതികളുടെ വീടിന്റെ ആടുക്കള ഷെഡാനാണ് ഇന്നലെ രാത്രി കൊമ്പൻ തകർത്തത് .രാത്രി 12.30 ഓടെ ആയിരുന്നു കാട്ടാനയുടെ ആക്രമണം .
വീടിന്റെ പിന്നിലെ പ്ലാവിൽ നിന്നും ചക്ക വീഴുന്ന ശബ്ദം കേട്ടാണ് ഫാമിലെ സെക്യൂരിറ്റിയായ രാജനും മകനും കൂടി വെളിയിൽ ഇറങ്ങിയത് . ഇവരെ കണ്ടതോടെ ആന അവർക്കുനേരെ പാഞ്ഞടുക്കുക ആയിരുന്നു . രണ്ടുപേരും ഓടി അടുക്കള ഷെഡിലൂടെ ഓടി വീടിനകത്ത് കയറിയപ്പോൾ പിന്നാലെ പാഞ്ഞുവന്ന ആന ഷെഡ് ഇടിച്ചു തകർക്കുക ആയിരുന്നു . രാജന്റെ പേരക്കുട്ടികൾ അടക്കം മൂന്ന് കുഞ്ഞു കുട്ടികൾ ഉൾപ്പെടെ എട്ട് പേരായിരിക്കുന്ന ആസമയത്ത് വീട്ടിൽ ഉണ്ടായിരുന്നത് .
പിന്മാറാതെ മുറ്റത്തുതന്നെ നിന്ന ആനയെ രാജനും മകനും ചേർന്ന് പടക്കം പൊട്ടിച്ച് ആനയെ വീടിന്റെ സമീപത്തുനിന്നും തുരത്തി . അപ്പോഴേക്കും ആർ ആർ ടി സംഘവും സ്ഥലത്തെത്തി . അടുക്കളയിൽ ഉപയോഗിക്കുന്ന പാത്രങ്ങൾ അടക്കം കാട്ടാനയുടെ ആക്രമണത്തിൽ നഷ്ടമായതായി ബിന്ദു പറയുന്നു .ഭാഗ്യം കൊണ്ടാണ് രാജനും മകനും ഇന്നലെ രാത്രി ആനക്ക് മുന്നിൽ നിന്നും രക്ഷപെട്ടത്.
Iritty
