---
title: " പയ്യന്നൂർ താലൂക്ക് ആശുപത്രി ദേശീയ പുരസ്കാര നിറവിൽ"
english_title: "In full on the National Award"
publisher: "malayorashabdam.in"
canonical_url: "https://malayorashabdam.truevisionnews.com/news/29882/In-full-on-the-National-Award"
published_at: "2022-03-05T14:02:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6223215edda62_Picsart_22-03-05_14-07-23-523.jpg"
keywords: []
---

#  പയ്യന്നൂർ താലൂക്ക് ആശുപത്രി ദേശീയ പുരസ്കാര നിറവിൽ

> **Lead Summary:** പയ്യന്നൂർ നഗരസഭ- പയ്യന്നൂർ താലൂക്ക് ആശുപത്രി ദേശീയ പുരസ്കാര നിറവിൽ. കോവിഡ് വാക്സിനേഷൻ രംഗത്ത് നഗരസഭയിൽ നടത്തിയ ഇടപെടലുകൾക്കാണ് പയ്യന്നൂർ താലൂക്കാശുപത്രിയിലെ ജൂനിയർ പബ്ലിക് ഹെൽത്ത് നഴ്സായ ടി. ഭവാനി പുരസ്കാരം കരസ്ഥമാക്കിയത്. മികച്ച കോവിഡ് വാക്സിനേറ്റര്‍ക്കുള്ള ദേശീയ അംഗീകാരത്തിന് കേരളത്തില്‍നിന്നും രണ്ടു പേരാണ്തി രഞ്ഞെടുക്കപ്പെട്ടത്.

## Article Content

പയ്യന്നൂർ നഗരസഭ- പയ്യന്നൂർ താലൂക്ക് ആശുപത്രി ദേശീയ പുരസ്കാര നിറവിൽ. കോവിഡ് വാക്സിനേഷൻ രംഗത്ത് നഗരസഭയിൽ നടത്തിയ ഇടപെടലുകൾക്കാണ് പയ്യന്നൂർ താലൂക്കാശുപത്രിയിലെ ജൂനിയർ പബ്ലിക് ഹെൽത്ത് നഴ്സായ ടി. ഭവാനി പുരസ്കാരം കരസ്ഥമാക്കിയത്. മികച്ച കോവിഡ് വാക്സിനേറ്റര്‍ക്കുള്ള ദേശീയ അംഗീകാരത്തിന് കേരളത്തില്‍നിന്നും രണ്ടു പേരാണ്തി രഞ്ഞെടുക്കപ്പെട്ടത്.

പയ്യന്നൂര്‍ താലൂക്ക് ആശുപത്രിയിലെ ഗ്രേഡ് വണ്‍ ജൂനിയര്‍ പബ്ലിക് ഹെല്‍ത്ത് നഴ്സ് ടി.ഭവാനി, തിരുവനന്തപുരം ജനറല്‍ ഹോസ്പിറ്റലിലെ ഗ്രേഡ് വണ്‍ നഴ്‌സിംഗ് ഓഫീസര്‍ ടി.ആര്‍.പ്രിയ എന്നിവര്‍ക്കാണ് ദേശീയ അംഗീകാരം.കോവിഡ് കാലമെന്നാൽ മരണക്കണക്ക് മാത്രമല്ല ജീവിത യാഥാർത്ഥ്യങ്ങൾ കൂടിയാണ്. അതിജീവനത്തിന്റെ , തിരിച്ച് വരവിന്റെ, വെല്ല് വിളികളുടെ ഒക്കെ കഥകൾ.

വൈറസിനെ വരുതിയിലാക്കാൻ പയ്യന്നൂർ നഗരസഭ നടത്തിയ തീവ്രശ്രമങ്ങൾ പലപ്പോഴും അസാദ്ധ്യമെന്ന് തോന്നിയേടത്ത് നിന്ന് പയ്യന്നൂരിലെ പൊതു സമൂഹത്തെയാകെ ചേർത്ത് പിടിച്ച് പയ്യന്നൂർ താലൂക്ക് ആശുപത്രി, പഴയങ്ങാടി താലൂക്ക് ആശുപത്രി, മുത്തത്തി നഗര പ്രാഥമിക ആരോഗ്യ കേന്ദ്രം, പയ്യന്നൂർ പകൽ വീട്, സന്നദ്ധ സംഘടനകൾ തുടങ്ങി പയ്യന്നൂർ നഗരസഭയിലെ മുഴുവൻ ജനങ്ങളെയും കോവിഡിനെതിരായി വാക്സിനെടുക്കുന്നതിലൂടെ സ്വയം പ്രതിരോധിക്കുന്നതിന്, സുരക്ഷിതരാക്കുന്നതിന് ലക്ഷ്യാധിഷ്ഠിതമായി നടത്തിയ പ്രയത്നങ്ങൾക്കുള്ള അംഗീകാരം കൂടിയാണിത്.

> കോവിഡ് വാക്സിനേഷൻ രംഗത്ത് നഗരസഭയിലെ അർഹരായ മുഴുവനാളുകൾക്കും രണ്ട് ഡോസ് വാക്സിൻ നൽകിയാണ് ഈ നേട്ടത്തിലേക്കെത്തിയത്. "കരുതലാണ് കവചം" എന്ന് ജനങ്ങളെ ഓർമ്മപ്പെടുത്തിക്കൊണ്ട് പയ്യന്നൂർ നഗരസഭയുടെ നേതൃത്വത്തിൽ നടത്തിയ പ്രയത്നങ്ങൾക്കുള്ള അംഗീകാരം കൂടിയാണിത്.

> പാർശ്വവൽക്കരിക്കപ്പെട്ടവർക്കുൾപ്പെടെ വ്യത്യസ്ത ക്യാമ്പയിനുകളിലൂടെ നഗരസഭയിൽ വാക്സിനേഷൻ രംഗത്ത് നടത്തിയ പ്രവർത്തനങ്ങൾ ദേശീയ തലത്തിൽ തന്നെ ശ്രദ്ധിക്കപ്പെട്ടിരുന്നു. "സഹയാത്ര" ക്വാമ്പയിനിലൂടെ ദീർഘകാല രോഗ ബാധിതരായ പാലിയേറ്റീവ് രോഗികൾക്കായും," തുണ" കാംപെയിനിലൂടെ ഭിന്നശേഷി വിഭാഗത്തിൽപ്പെടുന്നവരെയും " അതിഥി ദേവോ ഭവ" കാംപെയിൻ വഴി അതിഥി തൊഴിലാളികൾക്കായും " ചാരെ" കാംപെയിൻ വഴി തെരുവോരത്ത് അലഞ്ഞ് തിരിയുന്നവരുടെയും വാക്സിനേഷൻ, പുനരധിവാസം എന്നിവ ഉറപ്പ് വരുത്തുന്നതിലും പയ്യന്നൂരിൽ നടത്തിയ പ്രവർത്തനങ്ങൾ ശ്രദ്ധേയമായി.

ഒന്നരലക്ഷത്തോളം പേര്‍ക്ക് വാക്‌സിനേഷന്‍ നല്‍കാനായതിന്റെ അഭിമാന നേട്ടവുമായാണ് കഴിഞ്ഞ ഡിസംബര്‍ 28ന് പയ്യന്നൂര്‍ നഗരസഭ സമ്പൂര്‍ണ വാക്‌സിനേഷന്‍ പ്രഖ്യാപനം നടത്തിയത്.അതിന് ശേഷം നല്‍കിയ ബൂസ്റ്റര്‍ ഡോസുള്‍പ്പെടെ ഇപ്പോള്‍ രണ്ടുലക്ഷം പേര്‍ക്ക് വാക്‌സിനേഷന്‍ നല്‍കിക്കഴിഞ്ഞു.

ഈ പ്രവര്‍ത്തനങ്ങളിലെ മികവ് പരിഗണിച്ചാണ് ആരോഗ്യ പ്രവര്‍ത്തകയായ ഭവാനിയെ പുരസ്‌കാരത്തിനായി തെരഞ്ഞെടുത്തത്.33വര്‍ഷമായി ആരോഗ്യരംഗത്ത് പ്രവര്‍ത്തിക്കുന്ന ഭവാനിക്ക് 18 വര്‍ഷം മുമ്പാണ് പിഎസ് സിവഴി നിയമനം ലഭിച്ചത്. പെരിങ്ങോം,പുളിങ്ങോം,കരിവെള്ളൂര്‍,പഴയങ്ങാടി, എന്നിവിടങ്ങളില്‍ സേവനം ചെയ്തിരുന്ന ഇവര്‍ കഴിഞ്ഞ ഏഴുവര്‍ഷമായി പയ്യന്നൂര്‍ താലൂക്ക് ആശുപത്രിയിലാണ് സേവനം തുടരുന്നത്.

നിലേശ്വരം മടിക്കൈ സ്വദേശിയാണ്.അന്താരാഷ്ട്ര വനിതാദിനത്തോടനുബന്ധിച്ച് കേന്ദ്ര ആരോഗ്യമന്ത്രാലയം എല്ലാ സംസ്ഥാനങ്ങളില്‍ നിന്നും രണ്ടുവീതം വനിതാവാക്സിനേറ്റര്‍മാരെയാണ് ആദരിക്കുന്നത്.ന്യൂഡല്‍ഹിയിലെ നാഷണല്‍ ഇന്‍സ്റ്റിറ്റ്യൂട്ട് ഓഫ് ഫാമിലി മെഡിസിന്‍ അങ്കണത്തില്‍ നടക്കുന്ന ആദരിക്കല്‍ ചടങ്ങില്‍ കേന്ദ്ര ആരോഗ്യവകുപ്പ് മന്ത്രി മന്‍സുഖ് മാണ്ഡവ്യ മുഖ്യാതിഥി ആയി പങ്കെടുക്കും.കേന്ദ്ര ആരോഗ്യസഹമന്ത്രി ഡോ. ഭാരതി പ്രവിന്‍ പവാര്‍ ചടങ്ങില്‍ പങ്കെടുക്കും.

### Related Links & Sources
- [Original Story Source](https://malayorashabdam.truevisionnews.com/news/29882/In-full-on-the-National-Award)