---
title: "പയ്യന്നൂരിലെ ഒന്നരവയസുകാരന്റെ മരണം; ചികിത്സാ പിഴവ്, ഡോക്ടർമാർക്കെതിരെ ക്രിമിനൽ കേസിന് ശുപാർശ"
english_title: "Payyannur Toddler Death: Medical Board Recommends Criminal Case Against Doctors for Negligence"
publisher: "malayorashabdam.in"
canonical_url: "https://malayorashabdam.truevisionnews.com/news/372717/payyannur-toddler-death-medical-board-recommends-criminal-case-against-doctors-for-negligence"
published_at: "2026-07-16T12:57:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a588827be46c_babymemmorial.jpeg"
keywords: ["Payyannur", "Medical Board", "Kannur Hospital", "Anesthesia Delay", "Kerala News"]
---

# പയ്യന്നൂരിലെ ഒന്നരവയസുകാരന്റെ മരണം; ചികിത്സാ പിഴവ്, ഡോക്ടർമാർക്കെതിരെ ക്രിമിനൽ കേസിന് ശുപാർശ

> **Lead Summary:** **കണ്ണൂർ: **കണ്ണൂർ പയ്യന്നൂരിൽ ഒന്നര വയസുകാരൻ ദേവാൻഷ് ശൗര്യ ചികിത്സാ പിഴവിനെത്തുടർന്ന് മരിച്ച സംഭവത്തിൽ ചികിത്സിച്ച ഡോക്ടർമാർക്ക് ഗുരുതര വീഴ്ച സംഭവിച്ചതായി മെഡിക്കൽ ബോർഡിന്റെ കണ്ടെത്തൽ.

## Article Content

**കണ്ണൂർ: **കണ്ണൂർ പയ്യന്നൂരിൽ ഒന്നര വയസുകാരൻ ദേവാൻഷ് ശൗര്യ ചികിത്സാ പിഴവിനെത്തുടർന്ന് മരിച്ച സംഭവത്തിൽ ചികിത്സിച്ച ഡോക്ടർമാർക്ക് ഗുരുതര വീഴ്ച സംഭവിച്ചതായി മെഡിക്കൽ ബോർഡിന്റെ കണ്ടെത്തൽ.

പയ്യന്നൂരിലെ സ്വകാര്യ ആശുപത്രിയിൽ നടന്ന സംഭവത്തിൽ കുറ്റക്കാരായ ഡോക്ടർമാർക്കെതിരെ ക്രിമിനൽ കുറ്റം ചുമത്തി നടപടി എടുക്കണമെന്ന് അഞ്ചംഗ മെഡിക്കൽ ബോർഡ് ശുപാർശ ചെയ്തു.

എരമം സ്വദേശികളായ സൂരജിന്റെയും വിജിഷയുടെയും ഏകമകനാണ് ഒരു വർഷവും അഞ്ചുമാസവും പ്രായമുള്ള ദേവാൻഷ് ശൗര്യ. രാവിലെ 10:15-ഓടെ ആശുപത്രിയിൽ പ്രവേശിപ്പിച്ച കുട്ടിക്ക് അനസ്തേഷ്യ നൽകുന്നതിൽ കാലതാമസം വന്നതായാണ് റിപ്പോർട്ട്. വൈകുന്നേരത്തോടെയാണ് അനസ്തേഷ്യ നൽകിയത്. എന്തുകൊണ്ടാണ് ഇത്രയും സമയം വൈകിയതെന്ന് ആശുപത്രി അധികൃതർക്ക് വ്യക്തമായ മറുപടി നൽകാനായില്ലെന്നും ബോർഡ് പറയുന്നു.

വൈകുന്നേരമായപ്പോഴേക്കും കുട്ടിയുടെ മുറിവ് ഭേദപ്പെട്ടുവരികയായിരുന്നുവെന്നും ആ സമയത്ത് അനസ്തേഷ്യ നൽകുകയോ ശസ്ത്രക്രിയ നടത്തുകയോ ചെയ്യേണ്ട ആവശ്യമില്ലായിരുന്നുവെന്നും ബോർഡ് വിലയിരുത്തി.

ബോർഡിലെ മൂന്ന് അംഗങ്ങൾ ഡോക്ടർമാരുടെ ഭാഗത്ത് നിന്ന് വ്യക്തമായ അനാസ്ഥയുണ്ടായതായി റിപ്പോർട്ടിൽ രേഖപ്പെടുത്തി. ഒരു അംഗം ചികിത്സാ പിഴവില്ലെന്ന് വാദിച്ചു. മറ്റൊരാൾ പ്രത്യേക അഭിപ്രായം രേഖപ്പെടുത്തിയില്ല.

കൃത്യസമയത്ത് ശരിയായ ഇടപെടൽ ഉണ്ടായിരുന്നെങ്കിൽ കുഞ്ഞിന്റെ ജീവൻ രക്ഷിക്കാമായിരുന്നു എന്നാണ് ബോർഡ് രേഖകൾ പരിശോധിച്ചതിൽ നിന്ന് വ്യക്തമാകുന്നതെന്ന് അടുത്ത വൃത്തങ്ങൾ അറിയിച്ചു.

സംഭവത്തിൽ ശക്തമായ വകുപ്പുകൾ പ്രകാരം പോലീസ് വിശദമായ അന്വേഷണം തുടരും. പുതിയ ആശുപത്രി സംരക്ഷണ നിയമത്തിലെ ചട്ടങ്ങളും രോഗികളുടെ അവകാശങ്ങളും മുൻനിർത്തി കുറ്റക്കാർക്കെതിരെ നടപടി സ്വീകരിക്കുമെന്ന് പോലീസ് അറിയിച്ചു. സ്വകാര്യ മേഖലയിലെ സ്ഥാപനമായതിനാൽ സർക്കാർ തലത്തിലും കർശന ഇടപെടൽ ഉണ്ടാകുമെന്നാണ് സൂചന.

### Related Links & Sources
- [Original Story Source](https://malayorashabdam.truevisionnews.com/news/372717/payyannur-toddler-death-medical-board-recommends-criminal-case-against-doctors-for-negligence)