---
title: "ഓണപ്പരീക്ഷ അവസാനിച്ചു; സംസ്ഥാനത്തെ സ്‌കൂളുകൾ ഇന്ന് ഓണാവധിക്കായി അടയ്ക്കും"
english_title: "Kerala Schools Close Today for Onam Vacation; Reopening Date Announced"
publisher: "malayorashabdam.in"
canonical_url: "https://malayorashabdam.truevisionnews.com/news/379418/kerala-schools-close-today-for-onam-vacation-reopening-date-announced"
published_at: "2026-08-21T08:56:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a87c5f331807_dd.jpeg"
keywords: ["Kerala School Onam Holidays", "Onam Vacation 2026", "School Reopening Date", "Onam Celebrations"]
---

# ഓണപ്പരീക്ഷ അവസാനിച്ചു; സംസ്ഥാനത്തെ സ്‌കൂളുകൾ ഇന്ന് ഓണാവധിക്കായി അടയ്ക്കും

> **Lead Summary:** ഒന്നാം പാദവാർഷിക ഓണപ്പരീക്ഷകൾ പൂർത്തിയായതോടെ സംസ്ഥാനത്തെ വിദ്യാർഥികൾ ഇനി ഓണാഘോഷങ്ങളുടെയും അവധിയുടെയും സന്തോഷത്തിലേക്ക്. സംസ്ഥാനത്തെ സ്കൂളുകൾ വെള്ളിയാഴ്ച (ഇന്ന്) മുതൽ ഓണാവധിക്കായി അടയ്ക്കും.

## Article Content

ഒന്നാം പാദവാർഷിക ഓണപ്പരീക്ഷകൾ പൂർത്തിയായതോടെ സംസ്ഥാനത്തെ വിദ്യാർഥികൾ ഇനി ഓണാഘോഷങ്ങളുടെയും അവധിയുടെയും സന്തോഷത്തിലേക്ക്. സംസ്ഥാനത്തെ സ്കൂളുകൾ വെള്ളിയാഴ്ച (ഇന്ന്) മുതൽ ഓണാവധിക്കായി അടയ്ക്കും.

പരീക്ഷകളുടെ സമ്മർദങ്ങൾ മാറ്റിവെച്ച് ഓണത്തെ വരവേൽക്കാൻ കുട്ടികളും അധ്യാപകരും ഒരുങ്ങിക്കഴിഞ്ഞു. അവധിക്കാലം ആരംഭിക്കുന്നതിന് മുൻപായി വിദ്യാലയങ്ങളിൽ അത്തപ്പൂക്കളമിട്ടും വിവിധ കായിക-സാംസ്കാരിക മത്സരങ്ങൾ സംഘടിപ്പിച്ചും വിഭവസമൃദ്ധമായ ഓണസദ്യ ഒരുക്കിയും അതിഗംഭീരമായ ആഘോഷ പരിപാടികളാണ് ആസൂത്രണം ചെയ്തിരിക്കുന്നത്.

ഒത്തുചേരലിന്റെയും പരസ്പര സ്നേഹത്തിന്റെയും സന്ദേശം പകർന്നുനൽകുന്ന ആഘോഷ ചടങ്ങുകളിൽ അധ്യാപകരും വിദ്യാർഥികളും പി.ടി.എ പ്രതിനിധികളും സജീവമായി പങ്കാളികളാകും.വിദ്യാലയങ്ങളിലെ ഓണാഘോഷങ്ങൾക്ക് ശേഷം കുട്ടികൾ പൂർണ്ണമായും അവധിക്കാല ആഘോഷങ്ങളിലേക്ക് കടക്കും. പത്ത് ദിവസം നീണ്ടുനിൽക്കുന്ന ആഘോഷങ്ങൾക്കും ഓണാവധിക്കും ശേഷം ആഗസ്റ്റ് 31-ന് (തിങ്കളാഴ്ച) സ്കൂളുകൾ വീണ്ടും തുറന്ന് പ്രവർത്തനം ആരംഭിക്കും. ക്ലാസുകൾ വീണ്ടും ആരംഭിക്കുന്നതോടെ രണ്ടാം പാദവാർഷിക പഠന പ്രവർത്തനങ്ങൾക്ക് തുടക്കമാകും.

### Related Links & Sources
- [Original Story Source](https://malayorashabdam.truevisionnews.com/news/379418/kerala-schools-close-today-for-onam-vacation-reopening-date-announced)