---
title: "കനത്ത വേനൽമഴ തുടരുന്നത്കുറ്റ്യാട്ടൂർ മാങ്ങയ്‌ക്ക്‌ വൻ ഭീഷണിയാകുന്നു "
english_title: "Kuttiyattoor mango"
publisher: "malayorashabdam.in"
canonical_url: "https://malayorashabdam.truevisionnews.com/news/38140/kuttiyattoor-mango"
published_at: "2022-04-18T17:32:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/625d53a0e4817_Screenshot_20220418_173309.jpg"
keywords: []
---

# കനത്ത വേനൽമഴ തുടരുന്നത്കുറ്റ്യാട്ടൂർ മാങ്ങയ്‌ക്ക്‌ വൻ ഭീഷണിയാകുന്നു 

> **Lead Summary:** കണ്ണുർ:കനത്ത വേനൽമഴ തുടരുന്നത്കുറ്റ്യാട്ടൂർ മാങ്ങയ്‌ക്ക്‌ വൻ ഭീഷണിയാകുന്നു. രുചിക്കൂട്ടിൽ മുന്നിലുള്ള കുറ്റ്യാട്ടൂർ മാങ്ങയുടെ മധുരംചോർത്തുകയാണ്‌ വേനൽമഴ .ദേശസൂചികാ പദവി ലഭിച്ചതിനെത്തുടർന്ന്‌ നാട്ടിലും പുറത്തും തല്ല വിപണിയുള്ള കണ്ണുരിൻ്റെ സ്വന്തം മാമ്പഴം ഇപ്പോൾ നിലനിൽപ്പിന് തന്നെ ഭീഷണി നേരിടുകയാണ്.

## Article Content

കണ്ണുർ:കനത്ത വേനൽമഴ തുടരുന്നത്കുറ്റ്യാട്ടൂർ മാങ്ങയ്‌ക്ക്‌ വൻ ഭീഷണിയാകുന്നു. രുചിക്കൂട്ടിൽ മുന്നിലുള്ള കുറ്റ്യാട്ടൂർ മാങ്ങയുടെ മധുരംചോർത്തുകയാണ്‌ വേനൽമഴ .ദേശസൂചികാ പദവി ലഭിച്ചതിനെത്തുടർന്ന്‌ നാട്ടിലും പുറത്തും തല്ല വിപണിയുള്ള കണ്ണുരിൻ്റെ സ്വന്തം മാമ്പഴം ഇപ്പോൾ നിലനിൽപ്പിന് തന്നെ ഭീഷണി നേരിടുകയാണ്.

മാമ്പഴപ്രേമികൾ ധാരാളമായി വാങ്ങി പോകുന്ന കുറ്റ്യാട്ടൂർ മാങ്ങയ്ക്ക് മഴ അധികം കൊണ്ടാൽ പിന്നെ കേടുവരുമെന്ന് കണ്ണൂർ താഴെ ചൊവ്വയിലെ പഴ വർഗ കച്ചവടക്കാരനായ എം.ഷാജി പറയുന്നു.

ചാറ്റൽമഴപോലും താങ്ങാനുള്ള ശേഷി ഈ മാങ്ങയ്ക്കില്ല. മഴ വീണാൽ മാങ്ങ കേടാകും. എളുപ്പം പുഴുകയറി നശിക്കും. നാട്ടുമാങ്ങപോലെ മഴയെ പ്രതിരോധിക്കാൻ കുറ്റ്യാട്ടൂർ മാങ്ങക്കാകില്ലെന്നും അദ്ദേഹം പറഞ്ഞു.

കാലാവസ്ഥാ വ്യതിയാനത്തിന്റെ ഭാഗമായി കാലവർഷം നീണ്ടത്‌ കുറ്റ്യാട്ടൂർ മാങ്ങയുടെ ഉൽപ്പാദനത്തെ കാര്യമായി ബധിച്ചുവെന്നാണ് ഇതേക്കുറിച്ചു കർഷകർ പറയുന്നത്. തണുപ്പുകാലത്താണ്‌ മാവുകൾ പൂക്കുക. മഴപോയി തണുപ്പ്‌ കാലമെത്താൻ വൈകി.

അതിനാൽ മാങ്ങയുടെ വിളവെടുപ്പ്‌ സീസൺ മാറി. ഫെബ്രുവരി–-മാർച്ച്‌ മാസങ്ങളിലാണ്‌ മികച്ച മാങ്ങ ലഭിക്കുക. ഇക്കുറി സീസണിൽ അപൂർവമായേ മാങ്ങ ലഭിച്ചുള്ളൂവെന്നും ഇവർ പറയുന്നു.

കുറ്റ്യാട്ടൂർ മാങ്ങയുടെ ഉൽപ്പാദനവും സംഭരണവും വിപണനവും പ്രോത്സാഹിപ്പിക്കുന്നതിനായി തുടങ്ങിയ കുറ്റ്യാട്ടൂർ മാങ്ങ പ്രോഡ്യൂസർ കമ്പനി ഇത്തവണ മാങ്ങ പാട്ടത്തിെനെടുക്കാൻ അഞ്ചുലക്ഷം രൂപ ചെലവഴിച്ചിരുന്നു. 25 ടൺ മാങ്ങ മാത്രമാണ്‌ ഇതിനകം വിളവെടുത്തത്‌.

ഇതിന്‌ പുറമെ കർഷകരിൽനിന്ന്‌ മാങ്ങ നേരിട്ട്‌ വാങ്ങുന്നുണ്ട്‌. പച്ച മാങ്ങയിൽനിന്ന്‌ പുതുതായി ഉൽപാദിപ്പിച്ച സ്‌ക്വാഷിനും ജാമിനും ആവശ്യക്കാർ ഏറെയുള്ളയാണ്‌ പ്രതീക്ഷയെന്ന്‌ കമ്പനി എംഡി എൻ ബാലകൃഷ്‌ണൻ പറഞ്ഞു. കൂടുതൽ നാരും നല്ല മധുരവും പോഷകമൂല്യവുമുള്ള കൂറ്റ്യാട്ടൂർ മാങ്ങ വിപണിയിലെ പ്രിയ ഇനമാണ്‌.

ജില്ലയിൽ പ്രതിവർഷം 100 കോടി രൂപയുടെ കുറ്റ്യാട്ടൂർ മാങ്ങ ഉൽപ്പാദിപ്പിക്കുന്നുണ്ടെന്നാണ് ഏകദേശ കണക്ക്. ജന്മദേശമായ കുറ്റ്യാട്ടൂർ പഞ്ചായത്തിൽ മാത്രം ശരാശരി 50 കോടി രൂപയുടെ മാങ്ങ ലഭിക്കാറുണ്ട്. കുറ്റ്യാട്ടൂരിൽ 300 ഹെക്ടറിലായി പ്രതിവർഷം ഏകദേശം ഏഴായിരം ടൺ മാങ്ങ ഉൽപ്പാദിപ്പിക്കുന്നുണ്ടെന്നാണ് കണക്ക്.

മയ്യിൽ, കുറുമാത്തൂർ, മലപ്പട്ടം, കൊളച്ചേരി, നാറാത്ത്, മുണ്ടേരി, കൂടാളി തുടങ്ങിയ സമീപ പഞ്ചായത്തുകളിലും മലയോര മേഖലകളിലും കുറ്റ്യാട്ടൂർ മാങ്ങ വൻതോതിൽ ഉൽപ്പാദിപ്പിക്കുന്നുണ്ട്

### Related Links & Sources
- [Original Story Source](https://malayorashabdam.truevisionnews.com/news/38140/kuttiyattoor-mango)