---
title: "ഇനി 'വൃദ്ധസദനം' വേണ്ട, 'സ്നേഹാലയം' മതി; പേര് മാറ്റാൻ നിർദേശം നൽകി സാമൂഹിക നീതി വകുപ്പ്"
english_title: "Old Age Homes to be Renamed as Snehalyam: Social Justice Department Directive"
publisher: "malayorashabdam.in"
canonical_url: "https://malayorashabdam.truevisionnews.com/news/382143/old-age-homes-to-be-renamed-as-snehalyam-social-justice-department-directive"
published_at: "2026-09-11T13:36:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aa3b6c87607c_images_(13).jpeg"
keywords: []
---

# ഇനി 'വൃദ്ധസദനം' വേണ്ട, 'സ്നേഹാലയം' മതി; പേര് മാറ്റാൻ നിർദേശം നൽകി സാമൂഹിക നീതി വകുപ്പ്

> **Lead Summary:** **തിരുവനന്തപുരം:** സംസ്ഥാനത്ത് പ്രവർത്തിക്കുന്ന വയോജന പരിചരണ കേന്ദ്രങ്ങൾക്ക് ഇനി മുതൽ പുതിയ പേര്. 'വൃദ്ധസദനം' എന്ന പേരിന് പകരം 'സ്നേഹാലയം' എന്ന് പുനർനാമകരണം ചെയ്യാൻ സംസ്ഥാന സാമൂഹിക നീതി വകുപ്പ് ഔദ്യോഗികമായി നിർദേശം നൽകി. സർക്കാർ മേഖലയിൽ പ്രവർത്തിക്കുന്ന സ്ഥാപനങ്ങൾക്കും സ്വകാര്യ പങ്കാളിത്തത്തോടെയോ എൻ.ജി.ഒകളുടെ മേൽനോട്ടത്തിലോ നടത്തുന്ന കേന്ദ്രങ്ങൾക്കും ഈ ഉത്തരവ് ബാധകമായിരിക്കും. വയോജനങ്ങൾക്ക് കൂടുതൽ മാനുഷിക പരിഗണന നൽകുന്നതിനും അവരിൽ ഒറ്റപ്പെടൽ വികാരം ഒഴിവാക്കുന്നതിനും വേണ്ടിയാണ് ഇത്തരമൊരു മാറ്റം കൊണ്ടുവരുന്നത്.

## Article Content

**തിരുവനന്തപുരം:** സംസ്ഥാനത്ത് പ്രവർത്തിക്കുന്ന വയോജന പരിചരണ കേന്ദ്രങ്ങൾക്ക് ഇനി മുതൽ പുതിയ പേര്. 'വൃദ്ധസദനം' എന്ന പേരിന് പകരം 'സ്നേഹാലയം' എന്ന് പുനർനാമകരണം ചെയ്യാൻ സംസ്ഥാന സാമൂഹിക നീതി വകുപ്പ് ഔദ്യോഗികമായി നിർദേശം നൽകി. സർക്കാർ മേഖലയിൽ പ്രവർത്തിക്കുന്ന സ്ഥാപനങ്ങൾക്കും സ്വകാര്യ പങ്കാളിത്തത്തോടെയോ എൻ.ജി.ഒകളുടെ മേൽനോട്ടത്തിലോ നടത്തുന്ന കേന്ദ്രങ്ങൾക്കും ഈ ഉത്തരവ് ബാധകമായിരിക്കും. വയോജനങ്ങൾക്ക് കൂടുതൽ മാനുഷിക പരിഗണന നൽകുന്നതിനും അവരിൽ ഒറ്റപ്പെടൽ വികാരം ഒഴിവാക്കുന്നതിനും വേണ്ടിയാണ് ഇത്തരമൊരു മാറ്റം കൊണ്ടുവരുന്നത്.

ഇനി മുതൽ സ്ഥാപനങ്ങളുടെ പേരുവിവര ബോർഡുകളിലോ ഔദ്യോഗിക രേഖകളിലോ 'വൃദ്ധസദനം' എന്ന പദം ഒരു കാരണവശാലും ഉപയോഗിക്കാൻ പാടില്ലെന്നും ഉത്തരവിൽ വ്യക്തമാക്കുന്നു. മുതിർന്ന പൗരന്മാരുടെ അന്തസ്സും മാനസിക ക്ഷേമവും ഉറപ്പാക്കുന്നതിന്റെ ഭാഗമായി കേന്ദ്രങ്ങളുടെ പേര് മാറ്റണമെന്ന് മുൻപ് സംസ്ഥാന മനുഷ്യാവകാശ കമ്മീഷൻ സർക്കാരിനോട് ശുപാർശ ചെയ്തിരുന്നു. എന്നാൽ പ്രായോഗിക തലത്തിൽ ഇത് നടപ്പിലായിരുന്നില്ല.

വയോജനങ്ങളുടെ ക്ഷേമവും സുരക്ഷയും മുൻനിർത്തി സാമൂഹിക നീതി വകുപ്പ് പുതിയ ഉത്തരവ് കർശനമായി നടപ്പിലാക്കാൻ ഒരുങ്ങുകയാണ്. സമൂഹത്തിൽ പ്രായമായവരോടുള്ള മനോഭാവത്തിൽ ഗുണപരമായ മാറ്റം വരുത്താൻ ഈ പേരുമാറ്റം സഹായിക്കുമെന്നാണ് അധികൃതരുടെ പ്രതീക്ഷ. ഉത്തരവ് നിലവിൽ വന്നതോടെ സംസ്ഥാനത്തെ എല്ലാ ജില്ലകളിലെയും രജിസ്റ്റർ ചെയ്ത സ്ഥാപനങ്ങൾ തങ്ങളുടെ പേരുകളിൽ ആവശ്യമായ മാറ്റങ്ങൾ വരുത്തേണ്ടി വരും.

### Related Links & Sources
- [Original Story Source](https://malayorashabdam.truevisionnews.com/news/382143/old-age-homes-to-be-renamed-as-snehalyam-social-justice-department-directive)