---
title: "എൻടിപിസിയിൽ നിന്ന് ഉയർന്ന വിലയ്ക്ക് വൈദ്യുതി വാങ്ങാനുള്ള തീരുമാനം സർക്കാരും കെഎസ്ഇബിയും ഉപേക്ഷിക്കുന്നു"
english_title: "KSEB Drops NTPC Power Purchase Deal Due to High Costs"
publisher: "malayorashabdam.in"
canonical_url: "https://malayorashabdam.truevisionnews.com/news/382697/kseb-drops-ntpc-power-purchase-deal-high-cost"
published_at: "2026-09-15T11:07:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aa8d9c8e2149_download_(23).jpeg"
keywords: ["KSEB", "NTPC Power Deal", "Kerala Power Crisis", "MG Rajamanickam", "Electricity Rates Kerala", "NPCIL"]
---

# എൻടിപിസിയിൽ നിന്ന് ഉയർന്ന വിലയ്ക്ക് വൈദ്യുതി വാങ്ങാനുള്ള തീരുമാനം സർക്കാരും കെഎസ്ഇബിയും ഉപേക്ഷിക്കുന്നു

> **Lead Summary:** **തിരുവനന്തപുരം:** ദേശീയ താപവൈദ്യുതി കോർപ്പറേഷനിൽ (എൻടിപിസി - NTPC) നിന്ന് ഉയർന്ന വില നൽകി വൈദ്യുതി വാങ്ങാനുള്ള മുൻ തീരുമാനം ഉപേക്ഷിക്കാൻ സംസ്ഥാന സർക്കാരും കെഎസ്ഇബിയും ആലോചിക്കുന്നു. യൂണിറ്റിന് 30 രൂപ നിരക്കിൽ എൻടിപിസിയിൽ നിന്ന് വൈദ്യുതി വാങ്ങിയാൽ പ്രതിദിനം 12 കോടി രൂപയിൽ അധികം ചിലവ് വരുമെന്ന് ചൂണ്ടിക്കാട്ടി കെഎസ്ഇബി സർക്കാരിന് റിപ്പോർട്ട് നൽകി.

## Article Content

**തിരുവനന്തപുരം:** ദേശീയ താപവൈദ്യുതി കോർപ്പറേഷനിൽ (എൻടിപിസി - NTPC) നിന്ന് ഉയർന്ന വില നൽകി വൈദ്യുതി വാങ്ങാനുള്ള മുൻ തീരുമാനം ഉപേക്ഷിക്കാൻ സംസ്ഥാന സർക്കാരും കെഎസ്ഇബിയും ആലോചിക്കുന്നു. യൂണിറ്റിന് 30 രൂപ നിരക്കിൽ എൻടിപിസിയിൽ നിന്ന് വൈദ്യുതി വാങ്ങിയാൽ പ്രതിദിനം 12 കോടി രൂപയിൽ അധികം ചിലവ് വരുമെന്ന് ചൂണ്ടിക്കാട്ടി കെഎസ്ഇബി സർക്കാരിന് റിപ്പോർട്ട് നൽകി.

കരാറുമായി മുന്നോട്ട് പോയാലുണ്ടാകുന്ന ഭീമമായ സാമ്പത്തിക ബാധ്യതയെക്കുറിച്ച് സർക്കാരിനെ ഔദ്യോഗികമായി അറിയിച്ചിട്ടുണ്ടെന്ന് കെഎസ്ഇബി മാനേജിംഗ് ഡയറക്ടർ എം.ജി. രാജമാണിക്യം സ്ഥിരീകരിച്ചു. നേരത്തെ എൻടിപിസിയിൽ നിന്ന് ഉയർന്ന നിരക്കിൽ വൈദ്യുതി വാങ്ങാൻ സർക്കാർ തത്ത്വത്തിൽ അനുമതി നൽകിയിരുന്നു.

എന്നാൽ നിലവിലെ കെഎസ്ഇബിയുടെ സാമ്പത്തിക സ്ഥിതിയിൽ ഇത് കടുത്ത പ്രതിസന്ധി സൃഷ്ടിക്കുമെന്ന ബോധ്യത്തിലാണ് ബോർഡ് വിഷയം വീണ്ടും സർക്കാരിന്റെ ശ്രദ്ധയിൽപ്പെടുത്തിയത്. വിഷയത്തിന്റെ എല്ലാ വശങ്ങളും വിശദമായി പരിശോധിച്ച ശേഷമേ സർക്കാർ അന്തിമ തീരുമാനമെടുക്കൂ. ഉത്തരേന്ത്യൻ സംസ്ഥാനങ്ങളിൽ നിന്നുള്ള അധിക വൈദ്യുതി ലഭ്യതയും ഇതിന്റെ ഭാഗമായി വിലയിരുത്തുന്നുണ്ട്. ഉയർന്ന നിരക്കിൽ വൈദ്യുതി വാങ്ങുന്നത് പരമാവധി ഒഴിവാക്കുകയാണ് ലക്ഷ്യം.

അതിനിടെ, വരും ദിവസങ്ങളിൽ സംസ്ഥാനത്തെ വൈദ്യുതി പ്രതിസന്ധിക്ക് നേരിയ ആശ്വാസമുണ്ടാകുമെന്നാണ് കരുതുന്നത്. കേന്ദ്ര നിലയങ്ങളിൽ നിന്നും ആണവ നിലയങ്ങളിൽ (NPCIL) നിന്നും കൂടുതൽ വൈദ്യുതി ലഭ്യമാക്കാനുള്ള ശ്രമങ്ങൾ സജീവമായി നടക്കുന്നുണ്ട്. ഇതിന്റെ ഭാഗമായി എന്പിസിഐഎൽ സിഎംഡിയുമായി കൂടിക്കാഴ്ച നടത്തുന്നതിനായി കെഎസ്ഇബി സിഎംഡി എം.ജി. രാജമാണിക്യം നാളെ ഡൽഹിയിലേക്ക് തിരിക്കും.

സംസ്ഥാനത്ത് മഴ ഗണ്യമായി കുറഞ്ഞതും അന്തരീക്ഷ താപനില ഉയർന്നതുമാണ് വൈദ്യുതി ഉപഭോഗം വൻതോതിൽ വർദ്ധിക്കാൻ കാരണം. മുൻവർഷത്തെ അപേക്ഷിച്ച് 1000 മെഗാവാട്ടിലധികം അധിക ആവശ്യകതയാണ് ഈ സെപ്റ്റംബർ മാസത്തിൽ രേഖപ്പെടുത്തിയത്. ഇതാണ് സംസ്ഥാനത്തെ നിലവിലെ വൈദ്യുതി പ്രതിസന്ധി രൂക്ഷമാക്കിയത്.

### Related Links & Sources
- [Original Story Source](https://malayorashabdam.truevisionnews.com/news/382697/kseb-drops-ntpc-power-purchase-deal-high-cost)