---
title: "കണ്ണൂരിൽ അടി ഒരു ഉത്സവമാക്കുന്ന ഒരു ദേശമുണ്ട്"
english_title: "Kannur that makes feet a festival"
publisher: "malayorashabdam.in"
canonical_url: "https://malayorashabdam.truevisionnews.com/news/38469/kannur-that-makes-feet-a-festival"
published_at: "2022-04-20T16:04:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/625fe2fae6d50_Picsart_22-04-20_16-09-04-442.jpg"
keywords: []
---

# കണ്ണൂരിൽ അടി ഒരു ഉത്സവമാക്കുന്ന ഒരു ദേശമുണ്ട്

> **Lead Summary:** കണ്ണൂർ: കണ്ണൂരിൽ അടി ഒരു ഉത്സവമാക്കുന്ന ഒരു ദേശമുണ്ട്. മാവിലായിയെന്നാണ് അതിൻ്റെ പേര്. ഇവിടെയുള്ള അതിപ്രശസ്തമായ മാവിലക്കാവിൽ അടി ക്ഷേത്രാചാരത്തിൻ്റെ ഭാഗമായുള്ള ഒരു ഉത്സവമാണ് ' വിഷു ഉത്സവനാളുകളായ മേടം രണ്ടിനും മേടം നാലിനു മാണ് മാവിലാക്കാവിൽ അടിയുത്സവം അരങ്ങേറുന്നത്.

## Article Content

കണ്ണൂർ: കണ്ണൂരിൽ അടി ഒരു ഉത്സവമാക്കുന്ന ഒരു ദേശമുണ്ട്. മാവിലായിയെന്നാണ് അതിൻ്റെ പേര്. ഇവിടെയുള്ള അതിപ്രശസ്തമായ മാവിലക്കാവിൽ അടി ക്ഷേത്രാചാരത്തിൻ്റെ ഭാഗമായുള്ള ഒരു ഉത്സവമാണ് ' വിഷു ഉത്സവനാളുകളായ മേടം രണ്ടിനും മേടം നാലിനു മാണ് മാവിലാക്കാവിൽ അടിയുത്സവം അരങ്ങേറുന്നത്.

ഇതിനായി ഇരുഭാഗത്തും വ്രതശുദ്ധിയോടെ കൈക്കോളൻമാരും അവരെ ചുമലിലേറ്റുന്ന കുളിച്ചുടുക്കുന്ന നമ്പ്യാർ സമുദായക്കാരായ യുവാക്കളും അണിനിരക്കും. കൊവിഡ് മഹാമാരി കാരണം കഴിഞ്ഞ രണ്ടു വർഷം നിലച്ചുപോയ മാവിലാക്കാവിൽ വിഷു ഉത്സവത്തിൻ്റെ ഭാഗമായി നടന്ന അടിയുത്സവം ഇക്കുറി ജനാവലിയുടെ ആർപ്പുവിളികളോടെ ആവേശകരമായിരുന്നു.

മേടം രണ്ടിന് കച്ചേരിക്കാവിൽ അടിയുത്സവം കഴിഞ്ഞതിന് ശേഷമാണ് മേടം നാലിന് മൂന്നാംപാലത്തിനു സമീപത്തുള്ള നിലാഞ്ചിറ വയലിൽഅടിയുടെ പൂരം അരങ്ങേറിയത്.

'മൂത്തകുര്‍വ്വാട്', 'ഇളയ കുര്‍വ്വാട്' എന്നിങ്ങനെ രണ്ടായി തിരിഞ്ഞാണ് കൈക്കോളന്മാർ അടിയുത്സവം നടത്തിയത്.ഇവരെ ചുമലിലേറ്റി കുളിച്ചുടുത്ത നമ്പ്യാർ സമുദായത്തിലെ യുവാക്കളും അടിയുത്സവത്തിന് ആവേശമേറ്റി.

എല്ലാ വർഷവും മേടം നാലിനാണ് മാവിലാക്കാവിനടുത്തുള്ള നിലാഞ്ചിറയിൽ അടിയുത്സവം നടക്കാറുള്ളത്.ഇതിന് ശേഷം നാലിനാണ് നിലാഞ്ചിറയിൽ അടിയുത്സവം നടക്കാറുള്ളത്.

ക്ഷേത്ര ഐതിഹ്യവുമായി ബന്ധപ്പെട്ടാണ് മാവിലാക്കാവിൽ അടിയുത്സവം നടത്താറുള്ളത്. കച്ചേരിക്കാവില്‍ ബ്രാഹ്മണന്‍ ഈഴവപ്രമാണിയില്‍ നിന്നു അവില്‍പ്പൊതി വാങ്ങി തിങ്ങിനിറഞ്ഞ പുരുഷാരത്തിന് നടുവിലേക്ക് എറിഞ്ഞുകൊടുക്കുകയും അവില്‍ക്കൂടിനായി അടി തുടങ്ങുകയും ചെയ്തുവെന്നാണ് ഒരു ഐതിഹ്യം.

'മൂത്തകുര്‍വ്വാട്', 'ഇളയ കുര്‍വ്വാട്' എന്നിങ്ങനെ രണ്ടായി തിരിഞ്ഞാണ് അടി. കൈക്കോളന്‍മാര്‍ ആളുകളുടെ ചുമലില്‍ കയറി അന്യോന്യം പൊരുതിയത് കച്ചേരിക്കാവിലും നിലാഞ്ചിറ വയലിലും അടി അരങ്ങേറുന്നതിനെപ്പറ്റി ഐതീഹ്യങ്ങളുണ്ട്.

അതില്‍ ഒന്ന് ഇങ്ങനെയാണ് ഇന്നത്തെ കടമ്പൂര്‍ അംശത്തിലെ 'ഒരികര' എന്ന പ്രദേശത്തെ കച്ചേരി ഇല്ലത്താണ്, ചെമ്പകശ്ശേരി കോവിലകത്ത് തമ്പുരാനും കുടുംബവും താമസിച്ചിരുന്നത്. ആചാരപ്രകാരം വിഷുപുലരിയില്‍ ഈഴവപ്രമാണിയായ 'വണ്ണാത്തിക്കണ്ടി തണ്ടയാന്‍' തമ്പുരാന് അവില്‍പ്പൊതി കാഴ്ചവെയ്ക്കുന്ന പതിവുണ്ടായിരുന്നു.

തണ്ടയാന്‍ കാഴ്ചവെച്ച അവില്‍പ്പൊതിക്കായി തമ്പുരാന്റെ രണ്ടു മക്കളും തമ്മില്‍ ഉന്തും തള്ളും അടിയുമായി. കളി കാര്യമായതു കണ്ട് തമ്പുരാന്‍ തന്റെ കുലദൈവമായ ദൈവത്താറെ വിളിച്ച് ധ്യാനിച്ചു. ദൈവത്താര്‍ പ്രത്യക്ഷപ്പെട്ടു.

പക്ഷേ, ദൈവത്തിന് കുട്ടികളുടെ ഈ വികൃതിയില്‍ കൗതുകം തോന്നുകയും അല്‍പ്പസമയം അത് കണ്ട് രസിക്കുകയും ചെയ്തു. തുടര്‍ന്ന് അടി അവസാനിപ്പിക്കാന്‍ പറഞ്ഞു. ദേവപ്രീതിക്കായി എല്ലാ വര്‍ഷവും അടിയുത്സവം നടത്താന്‍ അരുളിച്ചെയ്യുകയും ചെയ്തു അടിയുത്സവത്തെ കുറിച്ചു.

മറ്റൊരു ഐതീഹ്യം കൂടിയുണ്ട് മാവിലാക്കാവിലെ ആരാധനാ മൂർത്തിയായ ദൈവത്താര്‍ തന്റെ ഉപക്ഷേത്രമായ കച്ചേരിക്കാവിലും അതിനടുത്തുള്ള ഇല്ലത്തും നിത്യസന്ദര്‍ശകനായിരുന്നു. ഇല്ലത്തുവെച്ച് രണ്ട് നമ്പ്യാര്‍ സഹോദരങ്ങളുമായി സൗഹൃദം പങ്കുവെയ്ക്കാറുണ്ടായിരുന്നു.

ഒരുനാള്‍ ഇല്ലത്തെ നമ്പൂതിരിക്ക് കാഴ്ചയായി ഈഴവപ്രമാണി ഒരു അവില്‍പ്പൊതി കാഴ്ചവെച്ചു. അവില്‍പ്പൊതി നമ്പൂതിരി ആ നമ്പ്യാര്‍ സഹോദരങ്ങള്‍ക്ക് എറിഞ്ഞുകൊടുത്തു. അവില്‍പ്പൊതിക്കായി അവര്‍ ഇരുവരും ഉന്തും തള്ളും അടിയുമായി. കണ്ടുനിന്ന ദൈവത്താര്‍ ഇരുവരെയും പ്രോത്സാഹിപ്പിച്ചു. അടി കാര്യമായതോടെ അത് അവസാനിപ്പിക്കാന്‍ ദൈവത്താര്‍ ആവശ്യപ്പെട്ടു.

ഒടുക്കം ഒരാള്‍ അവില്‍പ്പൊതി കൈക്കലാക്കി. അപ്പോഴും ഇരുവരുടെയും മനസില്‍ പകയുണ്ടായിരുന്നു. ഇതു തീർക്കാനായിമേടം നാലിന് നിലാഞ്ചിറ വയലില്‍ വെച്ച് അടി കുറിച്ചു ' ആദ്യ അടിയുടെ തുടര്‍ച്ചയായി പിന്നീട് തലമുറകൾ കൈമാറുന്ന ഒരു ആചാരമായി ഇതു മാറുകയായിരുന്നു.

എന്നാൽ നിലാഞ്ചിറയിലെ അടിയുത്സവത്തിൽ ദൈവത്താറിശ്വരൻ പങ്കെടുക്കാറില്ല. ഇതിൻ്റെ തലേന്ന് മൂന്നാം പാലം വയലിൽ നടക്കുന്ന അവൽപ്പൊതിയേറിലും തിക്കലിലും ദൈവത്താറുടെ സാന്നിധ്യമുണ്ടാകാറുണ്ട്.

നിലാഞ്ചിറയിലെ അടിയുത്സവ ദിവസം ദൈവത്താർ മാവിലക്കാവ് ക്ഷേത്രത്തിൽ ഭക്തജനങ്ങൾക്ക് അനുഗ്രഹം നൽകുകയാണ് പതിവ്.ഇത്തവണ വിവിധ ദേശങ്ങളിൽ നിന്നായി ആയിരക്കണക്കിന് ആളുകളാണ് മാവിലാക്കാവിലെ വിഷു ഉത്സവത്തിൽ പങ്കെടുത്തത്.

### Related Links & Sources
- [Original Story Source](https://malayorashabdam.truevisionnews.com/news/38469/kannur-that-makes-feet-a-festival)