---
title: "തിരുവനന്തപുരത്തെ സംഘർഷം: എസ്എഫ്ഐ-യൂത്ത് കോൺഗ്രസ് പ്രവർത്തകർക്കെതിരെ ജാമ്യമില്ലാ വകുപ്പ് പ്രകാരം കേസ്; ഇന്ന് സംസ്ഥാന വ്യാപക പ്രതിഷേധം"
english_title: "Thiruvananthapuram Violence: Police Case Against SFI and Youth Congress Workers"
publisher: "malayorashabdam.in"
canonical_url: "https://malayorashabdam.truevisionnews.com/news/384958/thiruvananthapuram-violence-sfi-youth-congress-police-case"
published_at: "2026-10-01T10:36:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6abdeae1c7c94_WhatsApp_Image_2026-10-01_at_10.10.32_AM.jpeg"
keywords: ["Thiruvananthapuram Violence", "SFI", "Youth Congress", "Kerala Police", "SFI Protest"]
---

# തിരുവനന്തപുരത്തെ സംഘർഷം: എസ്എഫ്ഐ-യൂത്ത് കോൺഗ്രസ് പ്രവർത്തകർക്കെതിരെ ജാമ്യമില്ലാ വകുപ്പ് പ്രകാരം കേസ്; ഇന്ന് സംസ്ഥാന വ്യാപക പ്രതിഷേധം

> **Lead Summary:** **തിരുവനന്തപുരം**: കഴിഞ്ഞ ദിവസം രാത്രിയിലുണ്ടായ രൂക്ഷമായ അക്രമ സംഭവങ്ങളിൽ എസ്എഫ്ഐ, യൂത്ത് കോൺഗ്രസ് പ്രവർത്തകർക്കെതിരെ പൊലീസ് കേസെടുത്തു. തിരുവനന്തപുരം മ്യൂസിയം പൊലീസാണ് സംഘർഷവുമായി ബന്ധപ്പെട്ട് വ്യത്യസ്തമായ രണ്ട് കേസുകൾ രജിസ്റ്റർ ചെയ്തിരിക്കുന്നത്.

## Article Content

**തിരുവനന്തപുരം**: കഴിഞ്ഞ ദിവസം രാത്രിയിലുണ്ടായ രൂക്ഷമായ അക്രമ സംഭവങ്ങളിൽ എസ്എഫ്ഐ, യൂത്ത് കോൺഗ്രസ് പ്രവർത്തകർക്കെതിരെ പൊലീസ് കേസെടുത്തു. തിരുവനന്തപുരം മ്യൂസിയം പൊലീസാണ് സംഘർഷവുമായി ബന്ധപ്പെട്ട് വ്യത്യസ്തമായ രണ്ട് കേസുകൾ രജിസ്റ്റർ ചെയ്തിരിക്കുന്നത്.

പ്രദേശത്ത് ക്രമസമാധാന നില തകർത്തതിനും അക്രമങ്ങൾ അഴിച്ചുവിട്ടതിനും ജാമ്യമില്ലാ വകുപ്പുകൾ ചുമത്തിയാണ് പ്രവർത്തകർക്കെതിരെ കേസ് എടുത്തിട്ടുള്ളത്. സംഘർഷത്തിന് പിന്നാലെ നഗരത്തിൽ വൻ പൊലീസ് സന്നാഹത്തെയാണ് സുരക്ഷയ്ക്കായി വിന്യസിച്ചിരിക്കുന്നത്.

പ്രദേശത്തെ സിസിടിവി ദൃശ്യങ്ങൾ പരിശോധിച്ച് അക്രമത്തിൽ നേരിട്ട് പങ്കെടുത്തവരെ തിരിച്ചറിയാനുള്ള ശ്രമങ്ങൾ പൊലീസ് ഊർജ്ജിതമാക്കിയിട്ടുണ്ട്. തുടർന്നുള്ള ദിവസങ്ങളിൽ കൂടുതൽ അറസ്റ്റ് ഉണ്ടാകുമെന്നാണ് പൊലീസ് നൽകുന്ന സൂചന. അതേസമയം, യൂത്ത് കോൺഗ്രസ് പ്രവർത്തകർ നടത്തിയ അതിക്രമത്തിലും അവർക്കെതിരെ കർശന നടപടിയെടുക്കാത്ത പൊലീസ് നിലപാടിലും പ്രതിഷേധിച്ച് ഇന്ന് സംസ്ഥാന വ്യാപകമായി ശക്തമായ പ്രതിഷേധ പരിപാടികൾ സംഘടിപ്പിക്കാൻ എസ്എഫ്ഐ സംസ്ഥാന കമ്മിറ്റി ആഹ്വാനം ചെയ്തു.

ക്യാമ്പസുകളിലും പൊതുനിരത്തുകളിലും പ്രതിഷേധ പ്രകടനങ്ങൾ നടത്താനാണ് സംഘടനയുടെ തീരുമാനം. അക്രമ സംഭവങ്ങളുടെ പശ്ചാത്തലത്തിൽ സംസ്ഥാനത്തിന്റെ വിവിധ ഭാഗങ്ങളിൽ പൊലീസ് ജാഗ്രതാ നിർദ്ദേശം നൽകിയിട്ടുണ്ട്. സമരം വരും ദിവസങ്ങളിൽ കൂടുതൽ ശക്തമാകാനാണ് സാധ്യത.

### Related Links & Sources
- [Original Story Source](https://malayorashabdam.truevisionnews.com/news/384958/thiruvananthapuram-violence-sfi-youth-congress-police-case)