---
title: "പി.എം. ശ്രീ പദ്ധതിയുമായി തൽക്കാലം മുന്നോട്ടുപോകേണ്ടെന്ന് തീരുമാനം; മുന്നണിയിൽ എതിർപ്പ് ശക്തം"
english_title: "Kerala Govt Pauses PM SHRI Scheme Implementation Amid opposition from Allies"
publisher: "malayorashabdam.in"
canonical_url: "https://malayorashabdam.truevisionnews.com/news/385328/kerala-govt-pauses-pm-shri-scheme-implementation"
published_at: "2026-10-03T13:16:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ac0b3803a361_images_(8).jpeg"
keywords: ["PM SHRI Scheme", "Kerala Education Department", "Youth League", "Kerala Politics", "PM SHRI News"]
---

# പി.എം. ശ്രീ പദ്ധതിയുമായി തൽക്കാലം മുന്നോട്ടുപോകേണ്ടെന്ന് തീരുമാനം; മുന്നണിയിൽ എതിർപ്പ് ശക്തം

> **Lead Summary:** **തിരുവനന്തപുരം**: കേന്ദ്ര സർക്കാരിന്റെ പി.എം. ശ്രീ പദ്ധതിയുമായി തൽക്കാലം മുന്നോട്ടുപോകേണ്ടതില്ലെന്ന് സംസ്ഥാന വിദ്യാഭ്യാസ വകുപ്പിന്റെ തീരുമാനം. പദ്ധതി നടപ്പിലാക്കുന്നതിനെതിരെ മുന്നണിയിൽ നിന്നും ഘടകകക്ഷിയായ മുസ്ലിം ലീഗിൽ നിന്നും എതിർപ്പ് ശക്തമായ സാഹചര്യത്തിലാണ് ഈ നീക്കം. ഇതിന്റെ ഭാഗമായി പി.എം. ശ്രീയുമായി ബന്ധപ്പെട്ട് രൂപീകരിച്ച ഉപസമിതിയുടെ യോഗങ്ങൾ ഉടൻ ചേരില്ലെന്ന് അധികൃതർ അറിയിച്ചു.

## Article Content

**തിരുവനന്തപുരം**: കേന്ദ്ര സർക്കാരിന്റെ പി.എം. ശ്രീ പദ്ധതിയുമായി തൽക്കാലം മുന്നോട്ടുപോകേണ്ടതില്ലെന്ന് സംസ്ഥാന വിദ്യാഭ്യാസ വകുപ്പിന്റെ തീരുമാനം. പദ്ധതി നടപ്പിലാക്കുന്നതിനെതിരെ മുന്നണിയിൽ നിന്നും ഘടകകക്ഷിയായ മുസ്ലിം ലീഗിൽ നിന്നും എതിർപ്പ് ശക്തമായ സാഹചര്യത്തിലാണ് ഈ നീക്കം. ഇതിന്റെ ഭാഗമായി പി.എം. ശ്രീയുമായി ബന്ധപ്പെട്ട് രൂപീകരിച്ച ഉപസമിതിയുടെ യോഗങ്ങൾ ഉടൻ ചേരില്ലെന്ന് അധികൃതർ അറിയിച്ചു.

വിഷയത്തിൽ വിദ്യാഭ്യാസ മന്ത്രി മുഖ്യമന്ത്രിയുമായി വിശദമായ ആശയവിനിമയം നടത്തിയിട്ടുണ്ട്. യൂത്ത് ലീഗ് ഉൾപ്പെടെയുള്ള സംഘടനകൾ പദ്ധതി നടപ്പിലാക്കുന്നതിനെതിരെ വലിയ വിമർശനങ്ങളും പ്രതിഷേധങ്ങളും ഉയർത്തിയിരുന്നു. ദേശീയ വിദ്യാഭ്യാസ നയത്തിന്റെ ഭാഗമായുള്ള പദ്ധതി നടപ്പിലാക്കുന്നത് പൊതുവിദ്യാഭ്യാസ മേഖലയിൽ പാർശ്വഫലങ്ങൾ ഉണ്ടാക്കുമെന്ന വാദമാണ് ഇവർ പ്രധാനമായും ഉന്നയിക്കുന്നത്.

അതേസമയം, പദ്ധതിയുടെ ഭാഗമായി തുടർന്ന് പ്രവർത്തിക്കണമെന്ന് ആവശ്യപ്പെട്ട് കേന്ദ്ര സർക്കാർ സംസ്ഥാനത്തിന് വീണ്ടും കത്തയച്ചിരുന്നു. കേന്ദ്ര വിദ്യാഭ്യാസ സെക്രട്ടറി, സംസ്ഥാന ചീഫ് സെക്രട്ടറിക്ക് അയച്ച കത്തിൽ, പദ്ധതിയിൽ പങ്കാളികളാകാൻ കേരളം ഇതിനകം ധാരണാപത്രത്തിൽ ഒപ്പിട്ടിട്ടുണ്ടെന്ന് ഓർമ്മിപ്പിച്ചു. വിദ്യാർത്ഥികളുടെ ഗുണനിലവാരമുള്ള വിദ്യാഭ്യാസം ഉറപ്പാക്കാൻ ഉപസമിതിയുടെ നടപടികൾ വേഗത്തിലാക്കണമെന്നും കുട്ടികളുടെ താല്പര്യം സംരക്ഷിക്കണമെന്നും കത്തിൽ വ്യക്തമാക്കുന്നു.

നിലവിലെ സർക്കാർ അധികാരത്തിൽ വന്ന ശേഷം കേന്ദ്രം അയക്കുന്ന രണ്ടാമത്തെ കത്താണിത്. എന്നാൽ ലീഗിന്റെയും മറ്റ് പോഷക സംഘടനകളുടെയും ശക്തമായ എതിർപ്പ് നിലനിൽക്കുന്നതിനാൽ കേന്ദ്രത്തിന്റെ കത്തിന് ശേഷവും പദ്ധതിയുമായി തൽക്കാലം മുന്നോട്ടുപോകേണ്ടതില്ലെന്ന നിലപാടിലാണ് സർക്കാർ.

### Related Links & Sources
- [Original Story Source](https://malayorashabdam.truevisionnews.com/news/385328/kerala-govt-pauses-pm-shri-scheme-implementation)