---
title: "'ഭവനരഹിതരില്ലാത്ത കേരളമാണ് ലക്ഷ്യം'; ലൈഫ് പദ്ധതി തുടരുമെന്ന് മുഖ്യമന്ത്രി വി.ഡി. സതീശൻ"
english_title: "Kerala Chief Minister VD Satheesan Speaks on LIFE Mission Project and Fishermen Welfare"
publisher: "malayorashabdam.in"
canonical_url: "https://malayorashabdam.truevisionnews.com/news/385597/kerala-cm-vd-satheesan-speech-life-mission-scheme-fishermen-welfare"
published_at: "2026-10-05T13:22:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ac3575939bf5_download_(62).jpeg"
keywords: ["VD Satheesan Chief Minister", "LIFE Mission Kerala", "Kerala Government Housing Scheme", "Kerala News"]
---

# 'ഭവനരഹിതരില്ലാത്ത കേരളമാണ് ലക്ഷ്യം'; ലൈഫ് പദ്ധതി തുടരുമെന്ന് മുഖ്യമന്ത്രി വി.ഡി. സതീശൻ

> **Lead Summary:** **തിരുവനന്തപുരം: **ഭവനരഹിതരില്ലാത്ത നവകേരള നിർമ്മിതിയാണ് സംസ്ഥാന സർക്കാരിന്റെ പ്രധാന ലക്ഷ്യമെന്ന് മുഖ്യമന്ത്രി വി.ഡി. സതീശൻ. പാവപ്പെട്ടവർക്ക് തലചായ്ക്കാൻ ഒരിടമൊരുക്കുന്ന ലൈഫ് ഭവന പദ്ധതി കൂടുതൽ ശക്തിപ്പെടുത്തി മുന്നോട്ട് കൊണ്ടുപോകുമെന്നും അദ്ദേഹം വ്യക്തമാക്കി.

## Article Content

**തിരുവനന്തപുരം: **ഭവനരഹിതരില്ലാത്ത നവകേരള നിർമ്മിതിയാണ് സംസ്ഥാന സർക്കാരിന്റെ പ്രധാന ലക്ഷ്യമെന്ന് മുഖ്യമന്ത്രി വി.ഡി. സതീശൻ. പാവപ്പെട്ടവർക്ക് തലചായ്ക്കാൻ ഒരിടമൊരുക്കുന്ന ലൈഫ് ഭവന പദ്ധതി കൂടുതൽ ശക്തിപ്പെടുത്തി മുന്നോട്ട് കൊണ്ടുപോകുമെന്നും അദ്ദേഹം വ്യക്തമാക്കി.

സംസ്ഥാനത്ത് നിർദ്ധനരായ വനിതകൾക്കായി സംഘടിപ്പിച്ച 'ഷീ സ്കൂട്ടർ' വിതരണ ചടങ്ങ് ഉദ്ഘാടനം ചെയ്ത് സംസാരിക്കവേയാണ് മുഖ്യമന്ത്രി സർക്കാരിന്റെ നയനിലപാടുകൾ വ്യക്തമാക്കിയത്. സംസ്ഥാന ബജറ്റിൽ ലൈഫ് പദ്ധതിയിൽ നിന്നും മത്സ്യത്തൊഴിലാളികളെ ഒഴിവാക്കി എന്ന പ്രചാരണത്തിലും അദ്ദേഹം വ്യക്തത വരുത്തി.

ലൈഫ് പദ്ധതിയിൽ നിന്ന് ഒഴിവാക്കുകയല്ല, മറിച്ച് കടലോര മേഖലയിലെ സഹോദരങ്ങളുടെ പ്രത്യേക ആവശ്യങ്ങൾ പരിഗണിച്ച് അവർക്കായി അതിലും മെച്ചപ്പെട്ട പുതിയ പ്രത്യേക ഭവന നിർമ്മാണ പദ്ധതി നടപ്പാക്കുകയാണ് സർക്കാർ ചെയ്യുന്നത്. മത്സ്യത്തൊഴിലാളി വിഭാഗത്തിന്റെ ക്ഷേമവും പുനരധിവാസവും ഉറപ്പാക്കാൻ സർക്കാർ പ്രതിജ്ഞാബദ്ധമാണെന്നും മുഖ്യമന്ത്രി കൂട്ടിച്ചേർത്തു.

വിഴിഞ്ഞം അന്താരാഷ്ട്ര തുറമുഖ പദ്ധതിയുമായി ബന്ധപ്പെട്ട് പ്രാദേശിക തൊഴിൽ ഉറപ്പാക്കുന്നതിലും സർക്കാർ വ്യക്തമായ നിലപാട് സ്വീകരിച്ചിട്ടുണ്ട്. വിഴിഞ്ഞത്തെയും പരിസര പ്രദേശങ്ങളിലെയും പ്രാദേശിക മത്സ്യത്തൊഴിലാളികൾക്ക് തുറമുഖവുമായി ബന്ധപ്പെട്ട വിവിധ മേഖലകളിൽ ജോലി നൽകണമെന്ന് നിർമ്മാണ കമ്പനിക്കും ബന്ധപ്പെട്ട ഉദ്യോഗസ്ഥർക്കും കർശന നിർദ്ദേശം നൽകിയിട്ടുണ്ടെന്ന് വി.ഡി. സതീശൻ അറിയിച്ചു.

നാടിന്റെ വികസനത്തോടൊപ്പം സാധാരണക്കാരുടെ ജീവിതനിലവാരം ഉയർത്തുന്ന പ്രവർത്തനങ്ങൾ തുടരുമെന്നും അദ്ദേഹം പ്രത്യാശ പ്രകടിപ്പിച്ചു.

### Related Links & Sources
- [Original Story Source](https://malayorashabdam.truevisionnews.com/news/385597/kerala-cm-vd-satheesan-speech-life-mission-scheme-fishermen-welfare)