---
title: "ഗ്യാനേഷ് കുമാറിനെതിരായ കെഎസ്ടിപി അഴിമതിക്കേസ്: പുനരന്വേഷണ സാധ്യത പരിശോധിക്കാൻ വിജിലൻസ്"
english_title: "KSTP Corruption Case: Vigilance to Re-examine Allegations Against Gyanesh Kumar"
publisher: "malayorashabdam.in"
canonical_url: "https://malayorashabdam.truevisionnews.com/news/385726/kstp-corruption-case-vigilance-to-re-examine-allegations-against-gyanesh-kumar"
published_at: "2026-10-06T11:21:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ac48cfb36aca_fhdh.jpeg"
keywords: ["Gyanesh Kumar", "KSTP Corruption Case", "Kerala Vigilance", "Patibel Company", "Reinvestigation"]
---

# ഗ്യാനേഷ് കുമാറിനെതിരായ കെഎസ്ടിപി അഴിമതിക്കേസ്: പുനരന്വേഷണ സാധ്യത പരിശോധിക്കാൻ വിജിലൻസ്

> **Lead Summary:** **തിരുവനന്തപുരം:** മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ കെഎസ്ടിപി അഴിമതി കേസിൽ കരുതലോടെ മുന്നോട്ട് പോകാൻ വിജിലൻസ് തീരുമാനം. കേസിൽ മുൻപ് ഗ്യാനേഷ് കുമാറിന് ക്ലീൻ ചിറ്റ് നൽകി അവസാനിപ്പിച്ച റിപ്പോർട്ട് വിശദമായി പരിശോധിക്കാൻ വിജിലൻസ് ഡയറക്ടർ നിർദേശം നൽകി. കേസിൽ പുനരന്വേഷണ സാധ്യതയുണ്ടോ എന്നതിനെക്കുറിച്ച് രണ്ട് ദിവസത്തിനകം റിപ്പോർട്ട് സമർപ്പിക്കാൻ സ്പെഷ്യൽ ഇൻവെസ്റ്റിഗേഷൻ യൂണിറ്റ്-1 എസ്പിയോട് ആവശ്യപ്പെട്ടിട്ടുണ്ട്.

## Article Content

**തിരുവനന്തപുരം:** മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ കെഎസ്ടിപി അഴിമതി കേസിൽ കരുതലോടെ മുന്നോട്ട് പോകാൻ വിജിലൻസ് തീരുമാനം. കേസിൽ മുൻപ് ഗ്യാനേഷ് കുമാറിന് ക്ലീൻ ചിറ്റ് നൽകി അവസാനിപ്പിച്ച റിപ്പോർട്ട് വിശദമായി പരിശോധിക്കാൻ വിജിലൻസ് ഡയറക്ടർ നിർദേശം നൽകി. കേസിൽ പുനരന്വേഷണ സാധ്യതയുണ്ടോ എന്നതിനെക്കുറിച്ച് രണ്ട് ദിവസത്തിനകം റിപ്പോർട്ട് സമർപ്പിക്കാൻ സ്പെഷ്യൽ ഇൻവെസ്റ്റിഗേഷൻ യൂണിറ്റ്-1 എസ്പിയോട് ആവശ്യപ്പെട്ടിട്ടുണ്ട്.

ദേശീയതലത്തിൽ തന്നെ ഏറെ ശ്രദ്ധിക്കപ്പെടുന്ന ഒന്നായതിനാൽ അതിജാഗ്രതയോടെ അന്വേഷണ നടപടികളിലേക്ക് കടക്കാനാണ് ആഭ്യന്തര വകുപ്പിന്റെ തീരുമാനം. കെപിസിസി നിർവാഹക സമിതി അംഗം നൽകിയ പരാതിയിൽ തുടർനടപടി സ്വീകരിക്കാൻ രമേശ് ചെന്നിത്തല നിർദേശിച്ച ഫയൽ നിലവിൽ വിജിലൻസ് ഡയറക്ടർക്ക് കൈമാറിയിട്ടുണ്ട്. 2007-ൽ തീർപ്പാക്കി അവസാനിപ്പിച്ച ഫയൽ വീണ്ടും തുറക്കുമ്പോൾ നിയമപരമായും സാങ്കേതികമായും ഒട്ടേറെ കടമ്പകളാണ് വിജിലൻസിന് മുന്നിലുള്ളത്.

കെഎസ്ടിപി കരാർ കമ്പനിയായ പതിബെല്ലിന്റെ പ്രോജക്ട് ഡയറക്ടർ ലീ സീ ബിൻ ജീവനൊടുക്കിയ സംഭവത്തിലേക്ക് നയിച്ച അഴിമതി ആരോപണങ്ങളാണ് കേസിന് ആധാരം. ലീ സീ ബിന്നിന്റെ മരണത്തെക്കുറിച്ച് അന്വേഷിക്കാൻ വിജിലൻസിന് പരിമിതികളുള്ളതിനാൽ അഴിമതിയുമായി ബന്ധപ്പെട്ട കാര്യങ്ങളിൽ മാത്രമായിരിക്കും അന്വേഷണം ശ്രദ്ധ കേന്ദ്രീകരിക്കുക. ഗ്യാനേഷ് കുമാറിനെതിരെ തെളിവുകളില്ലെന്ന് വ്യക്തമാക്കി മുൻപ് എഴുതിത്തള്ളിയ ഫയലുകളാണ് ഇപ്പോൾ വീണ്ടും വിജിലൻസ് പരിശോധിക്കുന്നത്.

പൊതുഭരണ, ധനകാര്യ വകുപ്പുകളിലെയും കെഎസ്ടിപിയിലെയും ഉദ്യോഗസ്ഥരുടെയും പതിബെൽ കമ്പനി പ്രതിനിധികളുടെയും മുൻ മൊഴികൾ അന്വേഷണ സംഘം വിശദമായി പുനഃപരിശോധിക്കും. ബില്ലുകൾ മാറി നൽകുന്നതിൽ മനഃപൂർവം കാലതാമസം വരുത്തിയതായി പതിബെൽ പ്രതിനിധികൾ മുൻപ് മൊഴി നൽകിയിരുന്നെങ്കിലും സാങ്കേതിക കാരണങ്ങൾ ചൂണ്ടിക്കാട്ടി പി.ഡബ്ല്യു.ഡി ഉദ്യോഗസ്ഥർ ഈ ആരോപണങ്ങളെ പ്രതിരോധിക്കുകയായിരുന്നു. ലീ സീ ബിൻ അഴിമതി ചൂണ്ടിക്കാട്ടി എഴുതിയ കത്ത് ലഭിക്കാൻ മുൻപ് വി.എസ് അച്യുതാനന്ദൻ സർക്കാരിന്റെ കാലത്ത് ശ്രമം നടത്തിയിരുന്നെങ്കിലും അന്വേഷണ ഏജൻസികൾക്ക് അത് കണ്ടെത്താനായിരുന്നില്ല.

അന്വേഷണത്തിന്റെ ആദ്യഘട്ടമായി മുൻപ് മൊഴി നൽകിയ എല്ലാവരുടെയും മൊഴികൾ വീണ്ടും രേഖപ്പെടുത്തും. കേസ് വീണ്ടും അന്വേഷിക്കാൻ 20 വർഷത്തെ കാലയളവ് ഒരു തടസ്സമല്ലെന്നാണ് ഡി.ജി.പിയുടെ നിയമോപദേശം. എങ്കിലും ഉന്നത ഉദ്യോഗസ്ഥനെതിരെ അന്വേഷണം നടത്തുന്നതിന് മുൻകൂർ ഭരണഘടനാ/നിയമപരമായ അനുമതികൾ ആവശ്യമായി വരുമെന്നാണ് വിജിലൻസിന്റെ കണക്കുകൂട്ടൽ. പ്രാഥമിക അന്വേഷണത്തിന് ശേഷമേ പുതിയ കേസ് രജിസ്റ്റർ ചെയ്യുന്നതിൽ അന്തിമ തീരുമാനമുണ്ടാകൂ. ലീ സീ ബിന്നിന്റെ ബന്ധുക്കളിൽ നിന്ന് മൊഴിയെടുക്കേണ്ടി വന്നാൽ കേന്ദ്ര ഏജൻസികളുടെ സഹായം തേടാനും വിജിലൻസ് ആലോചിക്കുന്നുണ്ട്.

### Related Links & Sources
- [Original Story Source](https://malayorashabdam.truevisionnews.com/news/385726/kstp-corruption-case-vigilance-to-re-examine-allegations-against-gyanesh-kumar)