---
title: "കാൻസർ മരുന്നുകളുടെ വില 70% വരെ കുറയും; നിർണായക തീരുമാനവുമായി കേന്ദ്രസർക്കാർ"
english_title: "Cancer Medicine Price Cut 70 Percent Central Government Trade Margin 30 Percent Supreme Court"
publisher: "malayorashabdam.in"
canonical_url: "https://malayorashabdam.truevisionnews.com/news/386183/cancer-medicine-price-cut-70-percent-central-government-trade-margin-30-percent-supreme-court"
published_at: "2026-10-09T05:27:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ac82e58ec320_1000335599.jpg"
keywords: ["Cancer Medicine", "Central Government", "Supreme Court"]
---

# കാൻസർ മരുന്നുകളുടെ വില 70% വരെ കുറയും; നിർണായക തീരുമാനവുമായി കേന്ദ്രസർക്കാർ

> **Lead Summary:** **ഡൽഹി**: കാൻസർ രോഗികൾക്ക് വലിയ ആശ്വാസം പകർന്ന് കേന്ദ്ര സർക്കാരിന്റെ നിർണായക തീരുമാനം. നാഷണൽ എസൻഷ്യൽ മെഡിസിൻ ലിസ്റ്റിൽ പെടാത്ത എല്ലാ പ്രൈവറ്റ്, ജനറിക്, ബ്രാൻഡഡ്, ഇറക്കുമതി ചെയ്യുന്ന കാൻസർ മരുന്നുകളുടെയും ട്രേഡ് മാർജിൻ പരമാവധി 30 ശതമാനമായി പരിമിതപ്പെടുത്താൻ തീരുമാനിച്ചു.

## Article Content

**ഡൽഹി**: കാൻസർ രോഗികൾക്ക് വലിയ ആശ്വാസം പകർന്ന് കേന്ദ്ര സർക്കാരിന്റെ നിർണായക തീരുമാനം. നാഷണൽ എസൻഷ്യൽ മെഡിസിൻ ലിസ്റ്റിൽ പെടാത്ത എല്ലാ പ്രൈവറ്റ്, ജനറിക്, ബ്രാൻഡഡ്, ഇറക്കുമതി ചെയ്യുന്ന കാൻസർ മരുന്നുകളുടെയും ട്രേഡ് മാർജിൻ പരമാവധി 30 ശതമാനമായി പരിമിതപ്പെടുത്താൻ തീരുമാനിച്ചു.

നിർമ്മാതാക്കൾ വിതരണക്കാർക്കും റീട്ടെയിലർമാർക്കും നൽകുന്ന വിലയും ഉപഭോക്താക്കൾക്ക് വിൽക്കുന്ന പരമാവധി വിലയും തമ്മിലുള്ള വ്യത്യാസം കുറയ്ക്കാനാണ് നടപടി. കാൻസർ മരുന്നുകളുടെ ഉയർന്ന ലാഭവിഹിതവും അമിതവിലയും നിയന്ത്രിക്കണമെന്ന് അടുത്തിടെ സുപ്രീം കോടതി നിർദേശിച്ചിരുന്നു.

ഈ ഇടപെടലിനെ തുടർന്നാണ് തീരുമാനം. പുതിയ പരിധി നിലവിൽ വരുന്നതോടെ വിപണിയിലുള്ള കാൻസർ മരുന്നുകളുടെ പരമാവധി വിൽപ്പന വിലയിൽ 70 ശതമാനം വരെ കുറവുണ്ടാകുമെന്നാണ് കണക്കാക്കുന്നത്. ഈ തീരുമാനത്തിലൂടെ രാജ്യത്തെ കാൻസർ രോഗികൾക്ക് പ്രതിവർഷം ഏകദേശം 2,500 കോടി രൂപയുടെ സാമ്പത്തിക ലാഭമുണ്ടാകും.

35 പേറ്റന്റുള്ള മരുന്നുകൾ ഉൾപ്പെടെ 110-ലധികം പ്രമുഖ കാൻസർ പ്രതിരോധ മരുന്നുകളെ ഉത്തരവ് സഹായിക്കും. നേരത്തെ അവശ്യമരുന്നുകളുടെ പട്ടികയിലുള്ള (NLEM) 131 കാൻസർ മരുന്നുകൾക്ക് മാത്രമായിരുന്നു നാഷണൽ ഫാർമസ്യൂട്ടിക്കൽ പ്രൈസിംഗ് അതോറിറ്റി വിലനിയന്ത്രണം ഏർപ്പെടുത്തിയിരുന്നത്.

പുതിയ ഉത്തരവിലൂടെ പട്ടികയ്ക്ക് പുറത്തുള്ള മരുന്നുകൾക്ക് വിതരണക്കാരും ആശുപത്രികളും ഈടാക്കിയിരുന്ന ഭീമമായ ലാഭവിഹിതം ഇല്ലാതാകും.

### Related Links & Sources
- [Original Story Source](https://malayorashabdam.truevisionnews.com/news/386183/cancer-medicine-price-cut-70-percent-central-government-trade-margin-30-percent-supreme-court)