---
title: "‘ഓപ്പറേഷൻ തൂഫാൻ’ ഊർജിതം; മലയോര മേഖലയിൽ ലഹരിക്കെതിരെ പരിശോധനയും ജനകീയ പ്രതിരോധവും ശക്തമാക്കി"
english_title: "Operation Thoofan: Public Drive and Police Crackdown Against Drugs in Peravoor"
publisher: "malayorashabdam.in"
canonical_url: "https://malayorashabdam.truevisionnews.com/news/389322/operation-thoofan-anti-drug-drive-intensified-peravoor-kannur"
published_at: "2026-10-29T20:19:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ae35d2c217b6_WhatsApp_Image_2026-10-29_at_20.18.38.jpeg"
keywords: []
---

# ‘ഓപ്പറേഷൻ തൂഫാൻ’ ഊർജിതം; മലയോര മേഖലയിൽ ലഹരിക്കെതിരെ പരിശോധനയും ജനകീയ പ്രതിരോധവും ശക്തമാക്കി

> **Lead Summary:** പേരാവൂർ: ലഹരി വ്യാപനത്തിനെതിരെ ജനപങ്കാളിത്തത്തോടെ പ്രതിരോധം തീർക്കാനും ലഹരിമുക്ത സമൂഹം കെട്ടിപ്പടുക്കാനുമുള്ള ബോധവൽക്കരണ പ്രവർത്തനങ്ങൾ വ്യാപിപ്പിക്കുന്നതിനുമായി 'ഓപ്പറേഷൻ തൂഫാനും' പ്രാദേശിക കൂട്ടായ്മകളും ശക്തമാക്കി. 'തൂഫാൻ തദ്ദേശം – ലഹരിക്കെതിരെ ജനസേന' എന്ന ആശയമുയർത്തി പോലീസും എക്സൈസും നാട്ടുകാരും കൈകോർക്കുകയാണ്.

## Article Content

പേരാവൂർ: ലഹരി വ്യാപനത്തിനെതിരെ ജനപങ്കാളിത്തത്തോടെ പ്രതിരോധം തീർക്കാനും ലഹരിമുക്ത സമൂഹം കെട്ടിപ്പടുക്കാനുമുള്ള ബോധവൽക്കരണ പ്രവർത്തനങ്ങൾ വ്യാപിപ്പിക്കുന്നതിനുമായി 'ഓപ്പറേഷൻ തൂഫാനും' പ്രാദേശിക കൂട്ടായ്മകളും ശക്തമാക്കി. 'തൂഫാൻ തദ്ദേശം – ലഹരിക്കെതിരെ ജനസേന' എന്ന ആശയമുയർത്തി പോലീസും എക്സൈസും നാട്ടുകാരും കൈകോർക്കുകയാണ്.

മലയോര മേഖലയിൽ ലഹരിവസ്തുക്കളുടെ വിൽപനയും വിതരണവും പൂർണ്ണമായി തടയാനായിട്ടില്ലെന്ന ആശങ്ക പ്രദേശവാസികൾക്കിടയിൽ ഇപ്പോഴും ശക്തമാണ്. വ്യാപകമായ പരിശോധനകൾക്കിടയിലും ലഹരി മാഫിയയുടെ ചില കണ്ണികൾ പിടിയിലാകാതെ പ്രവർത്തിക്കുന്നുവെന്ന പരാതി ഉയർന്ന പശ്ചാത്തലത്തിലാണ് പോലീസ് നടപടി കൂടുതൽ കടുപ്പിച്ചത്. പ്രധാന റോഡുകളിലും ഒറ്റപ്പെട്ട ഇടങ്ങളിലും പുഴയോരങ്ങളിലും വാഹന പരിശോധനയും രാപ്പകൽ നിരീക്ഷണവും ഊർജിതമാക്കിയിട്ടുണ്ട്.

ജനവാസ മേഖലകളിൽ നിന്ന് അകന്നുകിടക്കുന്ന ഒഴിഞ്ഞ പ്രദേശങ്ങൾ ലഹരി കൈമാറ്റത്തിനായി ദുരുപയോഗം ചെയ്യുന്നത് തടയാൻ ഏകോപിത നടപടികൾക്കാണ് തുടക്കമിട്ടിരിക്കുന്നത്. ലഹരിക്കെതിരായ പോരാട്ടം നിയമപാലകരുടെ മാത്രം ചുമതലയല്ലെന്നും കുടുംബങ്ങളിലും വിദ്യാലയങ്ങളിലും കൃത്യമായ അവബോധം സൃഷ്ടിച്ച് വിദ്യാർത്ഥികളെയും യുവാക്കളെയും വഴിതെറ്റാതെ കാക്കാൻ പൊതുസമൂഹത്തിന്റെ ജാഗ്രത അനിവാര്യമാണെന്നും അധികൃതർ വ്യക്തമാക്കി. തദ്ദേശ സ്വയംഭരണ സ്ഥാപനങ്ങൾ, സന്നദ്ധ സംഘടനകൾ, നാട്ടുകൂട്ടായ്മകൾ എന്നിവയെ ഏകോപിപ്പിച്ച് ലഹരിവിരുദ്ധ ജാഗ്രത ഫലപ്രദമായി താഴെത്തട്ടിലേക്ക് എത്തിക്കാനുള്ള തീവ്ര ശ്രമത്തിലാണ് അധികൃതർ.

### Related Links & Sources
- [Original Story Source](https://malayorashabdam.truevisionnews.com/news/389322/operation-thoofan-anti-drug-drive-intensified-peravoor-kannur)