---
title: "കൊച്ചിയിൽ ഡെങ്കിപ്പനി പടരുന്നു; ഒരു മാസം കൊണ്ട് 143 രോഗികൾ"
english_title: "Dengu fever spread in kochi"
publisher: "malayorashabdam.in"
canonical_url: "https://malayorashabdam.truevisionnews.com/news/50535/dengu-fever-spread-in-kochi"
published_at: "2022-06-23T12:28:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/62b40f4064029_dengyee.jpg"
keywords: []
---

# കൊച്ചിയിൽ ഡെങ്കിപ്പനി പടരുന്നു; ഒരു മാസം കൊണ്ട് 143 രോഗികൾ

> **Lead Summary:** ഡെങ്കിപ്പനി ഉൾപ്പെടെയുള്ള കൊതുകുജന്യ രോഗങ്ങൾ നഗരത്തിൽ പടർന്നുപിടിക്കുമ്പോൾ പ്രതികരണമില്ലാതെ കൊച്ചി നഗരസഭ. ഇന്നലെ മാത്രം 93 പേരാണ് ചികിത്സ തേടിയത്. എറണാകുളം ജില്ലയിൽ ഈ മാസം ഇതുവരെ 143 പേർക്കാണ് ഡെങ്കിപ്പനി സ്ഥിരീകരിച്ചത്. 660 പേരാണ് ഡെങ്കിപ്പനി ലക്ഷണങ്ങളോടെ ചികിത്സ തേടിയത്. ഇതിൽ പകുതിയിലധികം പേരും കൊച്ചി കോർപ്പറേഷൻ പരിധിയിലെ താമസക്കാരാണ്. ഈ മാസം ജില്ലയിൽ റിപ്പോർട്ട് ചെയ്ത രണ്ട് ഡെങ്കിപ്പനി മരണങ്ങളും കോർപ്പറേഷൻ പരിധിക്കുള്ളിലാണ്.

## Article Content

ഡെങ്കിപ്പനി ഉൾപ്പെടെയുള്ള കൊതുകുജന്യ രോഗങ്ങൾ നഗരത്തിൽ പടർന്നുപിടിക്കുമ്പോൾ പ്രതികരണമില്ലാതെ കൊച്ചി നഗരസഭ. ഇന്നലെ മാത്രം 93 പേരാണ് ചികിത്സ തേടിയത്. എറണാകുളം ജില്ലയിൽ ഈ മാസം ഇതുവരെ 143 പേർക്കാണ് ഡെങ്കിപ്പനി സ്ഥിരീകരിച്ചത്. 660 പേരാണ് ഡെങ്കിപ്പനി ലക്ഷണങ്ങളോടെ ചികിത്സ തേടിയത്. ഇതിൽ പകുതിയിലധികം പേരും കൊച്ചി കോർപ്പറേഷൻ പരിധിയിലെ താമസക്കാരാണ്. ഈ മാസം ജില്ലയിൽ റിപ്പോർട്ട് ചെയ്ത രണ്ട് ഡെങ്കിപ്പനി മരണങ്ങളും കോർപ്പറേഷൻ പരിധിക്കുള്ളിലാണ്.

ജില്ലാ വെക്ടർ കൺട്രോൾ വിഭാഗം നടത്തിയ പരിശോധനയിൽ ഈഡിസ്, ക്യൂലക്സ് കൊതുകുകൾ എന്നിവ മുനിസിപ്പാലിറ്റി പരിധിയിൽ പ്രജനനം നടത്തുന്നതായി കണ്ടെത്തിയിരുന്നു. ഈ സാഹചര്യത്തിൽ കൊതുക് നിർമാർജനം ഉൾപ്പെടെയുള്ള പ്രതിരോധ നടപടികൾ ഊർജിതമാക്കാൻ ജില്ലാ മെഡിക്കൽ ഓഫീസർ നഗരസഭയിലെ ആരോഗ്യവകുപ്പിന് നിർദ്ദേശം നൽകിയിരുന്നു. എന്നാൽ, മുനിസിപ്പൽ അധികൃതർ ഇതുവരെ ഒരു നടപടിയും സ്വീകരിച്ചിട്ടില്ല. നഗരസഭയിലെ കൊതുക് നിർമാർജന സ്ക്വാഡിൻറെ പ്രവർത്തനം കഴിഞ്ഞ വർഷം മാർച്ച് 31ന് അവസാനിച്ചതായി വിവരാവകാശ രേഖയിൽ പറയുന്നു. നിലവിൽ പുതിയ സ്ക്വാഡ് രൂപീകരിച്ചിട്ടില്ലെന്ന വിവരാവകാശ മറുപടിയും നഗരസഭ നൽകിയിട്ടുണ്ട്. കൊതുക് നിയന്ത്രണ പ്രവർത്തനങ്ങളുടെ ഭാഗമായി ചെറിയ കനാലുകൾ വൃത്തിയാക്കുന്നതിന് 25,000 രൂപ വീതം അനുവദിച്ചതായി വിവരാവകാശ രേഖയിൽ പറയുന്നു. എന്നാൽ ഈ പ്രവർത്തനം ഇതുവരെ നടപ്പാക്കിയിട്ടില്ല.

### Related Links & Sources
- [Original Story Source](https://malayorashabdam.truevisionnews.com/news/50535/dengu-fever-spread-in-kochi)