---
title: "ദേശീയ പതാകയൊരുക്കി തുടക്കം; ഇനി അവര്‍ സ്വയംതൊഴിലിന്റെ പാതയില്‍"
english_title: "Beginning with the preparation of the national flag; Now they are on the path of self-employment"
publisher: "malayorashabdam.in"
canonical_url: "https://malayorashabdam.truevisionnews.com/news/60609/beginning-with-the-preparation-of-the-national-flag-now-they-are-on-the-path-of-self-employment"
published_at: "2022-08-09T17:59:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/62f253ac948df_InShot_20220809_180050858.jpg"
keywords: []
---

# ദേശീയ പതാകയൊരുക്കി തുടക്കം; ഇനി അവര്‍ സ്വയംതൊഴിലിന്റെ പാതയില്‍

> **Lead Summary:** **ആറളം** : ദേശീയപതാക നിര്‍മാണത്തിലൂടെ സ്വയംതൊഴിലിന് തുടക്കമിട്ട് ആറളം ഫാമിലെ ആദിവാസി വനിതകള്‍. സ്വാതന്ത്ര്യത്തിന്റെ എഴുപത്തിയഞ്ചാം വാര്‍ഷികം പ്രമാണിച്ചുള്ള ആസാദി കാ അമൃത് മഹോത്സവത്തിന്റെ ഭാഗമായി 'ഹര്‍ ഘര്‍ തിരംഗ' ക്യാംപയിനായാണ് ഇവര്‍ പതാക നിര്‍മിക്കുന്നത്. ആറളം ഫാം 11ാം ബ്ലോക്കിലെ മഞ്ജു മാധവന്‍, 10ാം ബ്ലോക്കിലെ രമ്യ എന്നിവരാണ് ചൊവ്വാഴ്ച മുതല്‍ തയ്യല്‍ ജോലി ആരംഭിച്ചത്.

## Article Content

**ആറളം** : ദേശീയപതാക നിര്‍മാണത്തിലൂടെ സ്വയംതൊഴിലിന് തുടക്കമിട്ട് ആറളം ഫാമിലെ ആദിവാസി വനിതകള്‍. സ്വാതന്ത്ര്യത്തിന്റെ എഴുപത്തിയഞ്ചാം വാര്‍ഷികം പ്രമാണിച്ചുള്ള ആസാദി കാ അമൃത് മഹോത്സവത്തിന്റെ ഭാഗമായി 'ഹര്‍ ഘര്‍ തിരംഗ' ക്യാംപയിനായാണ് ഇവര്‍ പതാക നിര്‍മിക്കുന്നത്. ആറളം ഫാം 11ാം ബ്ലോക്കിലെ മഞ്ജു മാധവന്‍, 10ാം ബ്ലോക്കിലെ രമ്യ എന്നിവരാണ് ചൊവ്വാഴ്ച മുതല്‍ തയ്യല്‍ ജോലി ആരംഭിച്ചത്.

ത്രിവര്‍ണ പതാക നിര്‍മിച്ച് ജോലി ആരംഭിക്കണമെന്ന ഇവരുടെ ആഗ്രഹമാണ് ഇതിലൂടെ പൂവണിഞ്ഞത്. നേരത്തെ ഫാമില്‍ പരിശീലനം ലഭിച്ച് തയ്യില്‍ ജോലി ചെയ്യുന്ന 11-ാം ബ്ലോക്കിലെ മിനി ഗോപിയും പതാക നിര്‍മിക്കുന്നുണ്ട്. മൂവരും കൂടി 2500 പതാകകളാണ് നിര്‍മിക്കുക. ഇത് കുടുംബശ്രീ ജില്ലാ മിഷന്‍ വഴി തദ്ദേശസ്വയംഭരണ സ്ഥാപനങ്ങള്‍ക്ക് കൈമാറും.

മഞ്ജുവിനും രമ്യക്കും ആറളം കുടുംബശ്രീ സിഡിഎസിന്റെ കമ്മ്യൂണിറ്റി എന്റര്‍പ്രെസസ് ഫണ്ടില്‍ ഉള്‍പ്പെടുത്തി കുടുംബശ്രീ ജില്ലാ മിഷന്‍ തയ്യല്‍ സംരംഭം ആരംഭിക്കാന്‍ വായ്പ നല്‍കിയിരുന്നു. ഇത് ഉപയോഗിച്ചാണ് ഉപജീവനമാര്‍ഗത്തിനായി തയ്യല്‍ മെഷീന്‍ വാങ്ങി സ്വയംതൊഴില്‍ തുടങ്ങിയത്. കുടുംബശ്രീ മിഷന്റെ ഭാഗമായി ഇരുവര്‍ക്കും ഫാഷന്‍ ഡിസൈനിങ്ങില്‍ രണ്ടുമാസത്തെ പരിശീലനം നല്‍കിയിരുന്നു.

### Related Links & Sources
- [Original Story Source](https://malayorashabdam.truevisionnews.com/news/60609/beginning-with-the-preparation-of-the-national-flag-now-they-are-on-the-path-of-self-employment)