---
title: "എല്ലാ സ്കൂളിലും നവംബര്‍ 30-നകം പച്ചക്കറി തോട്ടങ്ങള്‍ സജ്ജീകരിക്കണമെന്ന് വി ശിവന്‍കുട്ടി"
english_title: "Sivan kitty "
publisher: "malayorashabdam.in"
canonical_url: "https://malayorashabdam.truevisionnews.com/news/78755/sivan-kitty"
published_at: "2022-11-06T05:48:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6366fd4b81fe9_n4390131741667693832002bc7ffff330fe6e02db4eabfe68c9a09e19d0843a0ba0d355f4522c73fd24ecd8.jpg"
keywords: []
---

# എല്ലാ സ്കൂളിലും നവംബര്‍ 30-നകം പച്ചക്കറി തോട്ടങ്ങള്‍ സജ്ജീകരിക്കണമെന്ന് വി ശിവന്‍കുട്ടി

> **Lead Summary:** **തിരുവനന്തപുരം: **വിഷരഹിത പച്ചക്കറികള്‍ ഉച്ചഭക്ഷണ മെനുവില്‍ ഉള്‍പ്പെടുത്താന്‍ പദ്ധതിയുണ്ടെന്ന് വിദ്യാഭ്യാസ മന്ത്രി വി.ശിവന്‍കുട്ടി.

## Article Content

**തിരുവനന്തപുരം: **വിഷരഹിത പച്ചക്കറികള്‍ ഉച്ചഭക്ഷണ മെനുവില്‍ ഉള്‍പ്പെടുത്താന്‍ പദ്ധതിയുണ്ടെന്ന് വിദ്യാഭ്യാസ മന്ത്രി വി.ശിവന്‍കുട്ടി.

ഇതിന്റെ ഭാഗമായി എല്ലാ സ്കൂളിലും നവംബര്‍ 30-നകം പച്ചക്കറി തോട്ടങ്ങള്‍ സജ്ജീകരിക്കണമെന്ന് ശിവന്‍കുട്ടി നിര്‍ദ്ദേശം നല്‍കി. തിരുവനന്തപുരത്ത് സംസ്ഥാനത്തെ 163 ഉച്ചഭക്ഷണ ഓഫീസര്‍മാരുടെയും 14 ഉച്ചഭക്ഷണ സൂപ്പര്‍വൈസര്‍മാരുടെയും യോഗത്തില്‍ പങ്കെടുത്ത് സംസാരിക്കുകയായിരുന്നു മന്ത്രി. വയനാട്, ഇടുക്കി ജില്ലകളിലെയും പാലക്കാട് ജില്ലയിലെ ട്രൈബല്‍ മേഖലകളിലേയും ഉച്ചഭക്ഷണ പദ്ധതിയുടെ പരിധിയില്‍ വരുന്ന കുട്ടികള്‍ക്ക് ആഴ്ചയില്‍ ഒരിക്കല്‍ 100 ഗ്രാം കപ്പലണ്ടി മിഠായി നല്‍കുന്ന പദ്ധതി ഈ അദ്ധ്യയന വര്‍ഷം നടപ്പിലാക്കുന്നതിന് ആലോചിക്കുന്നുണ്ടെന്ന് മന്ത്രി പറഞ്ഞു. ഇതിനായി കേന്ദ്ര ധനസഹായം തേടുമെന്നും മന്ത്രി വ്യക്തമാക്കി. ആരോഗ്യ വകുപ്പ്, ദേശീയ ആരോഗ്യ മിഷന്‍ എന്നിവയുടെ സഹകരണത്തോടെ സ്കൂള്‍ ആരോഗ്യ പരിപാടിയുടെ ഭാഗമായി കൃത്യമായ ഇടവേളകളില്‍ കുട്ടികളുടെ ആരോഗ്യ പരിശോധന നടത്താനുള്ള സംവിധാനങ്ങള്‍ ഏര്‍പ്പെടുത്തണ മെന്ന് മന്ത്രി യോഗത്തില്‍ അറിയിച്ചു.

അയണ്‍ഫോളിക് ആസിഡ്, വിരനിവാരണ ഗുളികകളുടെ വിതരണം എന്നിവ കാര്യക്ഷമമാക്കണമെന്നും ഉച്ചഭക്ഷണ പദ്ധതിയുടെ പരിധിയില്‍ വരുന്ന മുഴുവന്‍ സ്കൂളുകളിലേയും ഭക്ഷണ സാമ്ബിളുകള്‍ എന്‍.എബി.എല്‍ അക്രഡിറ്റേഷനുള്ള ലബോറട്ടറികളില്‍ മൈക്രോ ബയോളജിക്കല്‍-കെമിക്കല്‍ പരിശോധനകള്‍ക്ക് വിധേയമാക്കുമെന്നും അദ്ദേഹം വ്യക്തമാക്കി. ഉച്ചഭക്ഷണ പദ്ധതിയുടെ പരിധിയില്‍ വരുന്ന മുഴുവന്‍ പാചകതൊഴിലാളികള്‍ക്കും സ്റ്റേറ്റ് ഫുഡ് ക്രാഫ്റ്റ് ഇന്‍സ്റ്റിറ്റ്യൂട്ടുകളുടെ സഹായത്തോടെ ഇക്കൊല്ലം പരിശീലനം നല്‍കുമെന്നും ശിവന്‍കുട്ടി യോഗത്തില്‍ വ്യക്തമാക്കി.

### Related Links & Sources
- [Original Story Source](https://malayorashabdam.truevisionnews.com/news/78755/sivan-kitty)