കണ്ണൂർ: ആദിവാസികളോടുള്ള അവഗണന അവസാനിപ്പിക്കണമെന്നാവശ്യപ്പെട്ട് കോളയാട് പഞ്ചായത്തിലെ ചെക്യേരി- പെരുവ ഊരുകൂട്ടം സംയുക്ത സമരസമിതിയുടെയും കൊളയാട് കോൺഗ്രസ് മണ്ഡലം കമ്മിറ്റിയുടെയും നേതൃത്വത്തിൽ ആദിവാസികൾ നിൽപ്പ് സമരം നടത്തി.കണ്ണൂർ കലക്ടറേറ്റിനു മുന്നിൽ നടന്ന സമരം അഡ്വ. സജീവ് ജോസഫ് എം എൽ എ ഉദ്ഘാടനം ചെയ്തു.
ചെക്യേരി- പെരുവ കോളനി റോഡ് വികസനത്തിനായി നടപ്പു വർഷം തിരിച്ചെടുത്ത ടിഎസ്പി ഉടൻ നൽകുക, ആദിവാസികളുള്ള അവഗണന അവസാനിപ്പിക്കുക, അംബേദ്കർ സെറ്റിൽമെന്റ് സ്കീം ഉടൻ അനുവദിക്കുക, ആദിവാസികളുടെ യാത്രാക്ലേശം പരിഹരിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു നിൽപ്പ് സമരം.
പട്ടികവർഗ്ഗ വികസന വകുപ്പും ജില്ലാ ഭരണകൂടവും ആദിവാസി ജനവിഭാഗത്തോട് കാണിക്കുന്ന അവഗണന അവസാനിപ്പിക്കണമെന്ന് സജീവ് ജോസഫ് പറഞ്ഞു. കോളയാട് കോൺഗ്രസ് മണ്ഡലം പ്രസിഡന്റ് സാജൻ ചെറിയാൻ അധ്യക്ഷത വഹിച്ചു. പഞ്ചായത്ത് മെമ്പർ റോയ് പൗലോസ്, കാഞ്ഞിരോളി രാഘവൻ , സുരേഷ് ബാബു എളയാവൂർ തുടങ്ങിയവർ സംബന്ധിച്ചു.
Chekeri-Peruva group protests against government neglect