തലശ്ശേരി: ദേശീയപാതയിലേക്കുള്ള വാഹനങ്ങള്‍ കടന്നുപോകുന്ന ഗുണ്ടര്‍ട്ട് റോഡിലൂടെയുള്ള യാത്ര പേടിസ്വപ്നമാകുന്നു.
കണ്ണൂര്‍ -കോഴിക്കോട് റൂട്ടിലേക്കുള്ള ചെറുതും വലുതുമായ വാഹനങ്ങള്‍ ഇടതടവില്ലാതെ പോകുന്നത് വളരെ ഇടുങ്ങിയ ഈ റോഡിലൂടെയാണ്. വാഹനങ്ങള്‍ക്കിടയിലൂടെ ഏറെ ഭീതിയോടെയാണ് റോഡിനിരുവശത്ത് കൂടിയുള്ള കാല്‍നടയാത്ര. കണ്ണൊന്ന് തെറ്റിയാല്‍ അപകടം ഉറപ്പ്. ടൗണില്‍ മരുന്ന് വാങ്ങാനെത്തിയ കാവുംഭാഗം കയനോത്ത് വീട്ടില്‍ കെ.പി. പത്മകുമാരി (60) ബുധനാഴ്ച ഉച്ചക്ക് ശേഷം ജനറല്‍ ആശുപത്രി പരിസരത്ത് കണ്ടെയ്നര്‍ ലോറി ഇടിച്ച്‌ മരിച്ചതോടെ ഇതുവഴിയുള്ള നിത്യയാത്രക്കാരുടെ ഭീതി ഇരട്ടിച്ചു.
തലശ്ശേരി ജനറല്‍ ആശുപത്രി, അഗ്നിരക്ഷസേന, സേക്രഡ് ഹാര്‍ട്ട് ഹയര്‍ സെക്കന്‍ഡറി സ്കൂള്‍, സെന്റ് ജോസഫ്സ് ഹയര്‍ സെക്കന്‍ഡറി സ്കൂള്‍, പൊലീസ് സ്റ്റേഷന്‍, കോട്ട, സ്റ്റേഡിയം, സ്വകാര്യ ബാങ്കുകള്‍ മെഡിക്കല്‍ ലാബുകള്‍ എന്നിവിടങ്ങളിലേക്ക് ആളുകള്‍ നിത്യവും പോകുന്ന ഗുണ്ടര്‍ട്ട് റോഡില്‍ കാല്‍നട ഏറെ ദുഷ്കരമാണ്. റോഡ് മുമ്ബുള്ളതിനേക്കാള്‍ ഉയര്‍ത്തിയതോടെയാണ് കാല്‍നട അസാധ്യമായത്. റോഡിന്റെ പ്രതലം നേരെയാക്കാത്തതിനാല്‍ വാഹനങ്ങള്‍ പോകുമ്ബോള്‍ കാല്‍നടക്കാര്‍ സ്ഥാപനങ്ങളുടെ വരാന്തയിലേക്ക് മാറിനില്‍ക്കേണ്ട അവസ്ഥയാണ്.
ജനറല്‍ ആശുപത്രി കവലയില്‍ ഗതാഗതം നിയന്ത്രിക്കാന്‍ പൊലീസുകാരില്ല. മന്ത്രിമാരുടെ വാഹനങ്ങള്‍ കടന്നുവരുന്ന സമയത്ത് മാത്രമെ ട്രാഫിക് പൊലീസുകാരെ കാണുകയുള്ളൂ. വിദ്യാലയങ്ങള്‍ അടുത്തയാഴ്ച തുറക്കുന്നതോടെ ഗുണ്ടര്‍ട്ട് റോഡിലെ തിരക്ക് വര്‍ധിക്കും. കണ്ണൂരില്‍ നിന്നുള്ള ലോറിയടക്കമുള്ള വലിയ വാഹനങ്ങള്‍ ദേശീയപാത വീനസ് കവലയില്‍ നിന്ന് ഗുഡ്സ് ഷെഡ്റോഡ് വഴി തിരിച്ചുവിട്ടാല്‍ ഗുണ്ടര്‍ട്ട് റോഡിലെ തിരക്ക് ഒഴിവാക്കാനാവും.
Gundert Road
