നരേന്ദ്ര മോദിയുടെ സന്ദർശനം: ശനിയാഴ്ച വയനാട് ജില്ലയിലെ ഗതാഗത നിയന്ത്രണം അറിഞ്ഞിരിക്കുക

 കൽപ്പറ്റ: പ്രധാനമന്ത്രി നരേന്ദ്ര മോദി വയനാട്ടിലെ ദുരന്ത ബാധിത പ്രദേശം സന്ദർശിക്കുന്നതിന്റെ ഭാ​ഗമായി 10ന് ശനിയാഴ്ച ജില്ലയിൽ ​ഗതാ​ഗത നിയന്ത്രണം ഏർപ്പെടുത്തിയതായി ജില്ലാ പൊലീസ് മേധാവി അറിയിച്ചു. പത്താം തീയതി രാവിലെ പത്ത് മണി മുതലാണ് നിയന്ത്രണം. 12 മണി മുതൽ 3 മണി വരെ പ്രധാമന്ത്രി വയനാട്ടിൽ ചെലവഴിക്കുമെന്നാണ് റിപ്പോർട്ടുകൾ. കൽപ്പറ്റ, മേപ്പാടി ടൗണുകളിൽ വാഹനങ്ങൾ പാർക്ക് ചെയ്യാൻ പാടില്ല. ഇവിടേക്ക് ആംബുലൻസ് ഉൾപ്പെടെയുള്ള അത്യാവശ്യ വാഹനങ്ങളെ മാത്രമേ കയറ്റി വിടുകയുള്ളുവെന്നും പൊലീസ് വ്യക്തമാക്കി.

Also read: കേരള ഫോക് ലോർ അക്കാദമി അവാർഡിന് അപേക്ഷ ക്ഷണിച്ചു

ടാക്സി, ഓട്ടോറിക്ഷ ഉൾപ്പെടെയുള്ള സ്വകാര്യ വാഹനങ്ങൾ രാവിലെ 11 മുതൽ പ്രധാനമന്ത്രി സന്ദർശനം കഴിഞ്ഞു മടങ്ങുന്നതു വരെ കൽപ്പറ്റ- കൈനാട്ടി ബൈപ്പാസ് ജങ്ഷൻ മുതൽ മേപ്പാടി വിംസ് ആശുപത്രി വരെയും മേപ്പാടി ടൗൺ മുതൽ ചൂരൽമല വരെയുള്ള റോഡിന്റെ ഇരു വശങ്ങളിലും പാർക്ക് ചെയ്യാൻ പാടില്ല. കൽപ്പറ്റ ജനമൈത്രി ജങ്ഷൻ മുതൽ കെഎസ്ആർടിസി ​ഗാരേജ് ജങ്ഷൻ വരെയും പാർക്കിങ് നിയന്ത്രണം ബാധകമാണ്. സുൽത്താൻ ബത്തേരി- മാനന്തവാടി ഭാ​ഗത്തു നിന്നു കോഴിക്കോട് ഭാ​ഗത്തേക്ക് പോകുന്ന കെഎസ്ആർടിസി, സ്വകാര്യ ബസുകൾ കൽപ്പറ്റ, കൈനാട്ടി ജങ്ഷൻ കഴിഞ്ഞുള്ള ബൈപ്പാസ് റോഡിൽ കയറി ആളുകളെ ഇറക്കുകയും കയറ്റുകയും ചെയ്ത ശേഷം കൽപ്പറ്റ ബൈപ്പാസിലൂടെ പോകണം. കോഴിക്കോട് നിന്നു മാനന്തവാടി, ബത്തേരി ഭാ​ഗത്തേക്ക് വരുന്ന കെഎസ്ആർടിസി, സ്വകാര്യ ബസുകൾ കൽപ്പറ്റ ജനമൈത്രി ജങ്ഷൻ കഴിഞ്ഞുള്ള ബൈപ്പാസ് റോഡിലൂടെ കയറി ആളെയിറക്കുകയും ചെയ്ത ശേഷം ബൈപ്പാസിലൂടെ തന്നെ പോകണം.

വടുവൻചാൽ ഭാ​ഗത്തു നിന്നു വരുന്ന കെഎസ്ആർടിസി, സ്വകാര്യ ബസുകൾ മൂപ്പൈനാട്- നെടുമ്പാല- തൃക്കൈപ്പറ്റ- മുട്ടിൽ- കൈനാട്ടി വഴി ബൈപ്പാസിലേക്ക് കയറണം. ബത്തേരി, മാനന്തവാടി ഭാ​ഗത്തു നിന്നു കൽപ്പറ്റയ്ക്ക് വരുന്ന വാഹനങ്ങൾ ബൈപ്പാസിൽ കയറി കൈനാട്ടി ജങ്ഷനിൽ ആളെയിറക്കി തിരിച്ചു പോകണം. ബത്തേരി ഭാ​ഗത്തു നിന്നു കോഴിക്കോട് ഭാ​ഗത്തേക്ക് പോകുന്ന ചെറിയ വാഹനങ്ങൾ കൈനാട്ടി ജങ്ഷനിൽ നിന്നു തിരിഞ്ഞു പുളിയാർമല- മണിയൻകോട്- മുണ്ടേരി- വെയർഹൗസ് ജങ്ഷൻ- പുഴമുടി- വെള്ളാരംകുന്ന് വഴി പോകണം. മാനന്തവാടി ഭാ​ഗത്തു നിന്നു കോഴിക്കോട് ഭാ​ഗത്തേക്ക് പോകുന്ന വാഹനങ്ങൾ നാലാം മൈൽ- വെള്ളമുണ്ട- കുറ്റ്യാടി ചുരം വഴി പോകണം. കോഴിക്കോട് ഭാ​ഗത്തു നിന്നു മാനന്തവാടി ഭാ​ഗത്തേക്കു വരുന്ന വാഹനങ്ങൾ വൈത്തിരി- പൊഴുതന- പടിഞ്ഞാറത്തറ വഴിയാണ് പോകേണ്ടത്. കോഴിക്കോട് ഭാ​ഗത്തു നിന്നു ബത്തേരി ഭാ​ഗത്തേക്കുള്ള വാഹനങ്ങൾ വൈത്തിരി- പൊഴുതന- പടിഞ്ഞാറത്തറ- കമ്പളക്കാട്- പച്ചിലക്കാട്- മീനങ്ങാടി വഴി പോകണം. വടുവൻചാൽ ഭാ​ഗത്തു നിന്നു കൽപ്പറ്റയിലേക്കുള്ള വാഹനങ്ങൾ മൂപ്പൈനാട്- നെടുമ്പാല- തൃക്കൈപ്പറ്റ- മുട്ടിൽ വഴിയും പോകണം.

Also read: വാക് ഇൻ ഇന്റർവ്യൂ

ബത്തേരി ഭാ​ഗത്തു നിന്നു കോഴിക്കോടേക്ക് പോകുന്ന ചരക്ക് വാഹനങ്ങൾ ബീനാച്ചി- കേണിച്ചിറ- പനമരം- നാലാം മൈൽ വഴിയോ മീനങ്ങാടി- പച്ചിലക്കാട്- നാലാം മൈൽ വഴിയോ കുറ്റ്യാടി ചുരം വഴി പോകണം. മാനന്തവാടി ഭാ​ഗത്തു നിന്നു കോഴിക്കോട് ഭാ​ഗത്തേക്ക് പോകുന്ന ചരക്ക് വാഹനങ്ങൾ നാലാം മൈൽ- വെള്ളമുണ്ട വഴി കുറ്റ്യാടി ചുരം വഴിയും പോകേണ്ടതാണ്.

Narendra Modi's visit: traffic restrictions in Wayanad district on Saturday