മുഴക്കുന്ന് പോലീസ് സ്റ്റേഷൻ സ്ഥലപരിമിതിക്കുള്ളിലെ വീർപ്പുമുട്ടലിൽനിന്ന്‌ സ്വന്തം കെട്ടിടത്തിലേക്ക് മാറാൻ ഒരുങ്ങുന്നു.

ഇരിട്ടി : മുഴക്കുന്ന് പോലീസ് സ്റ്റേഷൻ വാടകക്കെട്ടിടത്തിലെ സ്ഥലപരിമിതിക്കുള്ളിലെ വീർപ്പുമുട്ടലിൽനിന്ന്‌ സ്വന്തം കെട്ടിടത്തിലേക്ക് മാറാൻ ഒരുങ്ങുന്നു. ജനകീയ പങ്കാളിത്തത്തോടെ നിർമിക്കുന്ന പുതിയ പോലീസ് സ്റ്റേഷൻ കെട്ടിടത്തിന്റെ നിർമാണം അന്തിമഘട്ടത്തിലാണ്. പോലീസ് ആസ്ഥാനത്തുനിന്ന്‌ അനുമതി ലഭിക്കുന്നതോടെ സ്റ്റേഷൻ പുതിയ കെട്ടിടത്തിലേക്ക് മാറും. നാട്ടുകാർ പണം പിരിച്ചെടുത്താണ് കെട്ടിട നിർമാണത്തിന് ആവശ്യമായ സ്ഥലം വാങ്ങിയത്. 2016-ൽ യു.ഡി.എഫ്. സർക്കാരിന്റെ അവസാനകാലത്താണ് കാക്കയങ്ങാട് ആസ്ഥാനമായി മുഴക്കുന്നിൽ പോലീസ് സ്റ്റേഷൻ അനുവദിച്ചത്. പാലപ്പുഴ-കാക്കയങ്ങാട് റോഡരികിലെ ചെറിയ കെട്ടിടത്തിലാണ് സ്റ്റേഷൻ തുടങ്ങിയത്. നാൽപ്പതോളം പോലീസുകാർ വളരെ പ്രയാസപ്പെട്ടാണ് ഇവിടെ ജോലിയെടുക്കുന്നത്.

Also read: മകരവിളക്ക്: ശബരിമലയിൽ സ്പോട്ട് ബുക്കിങ് കുത്തനെ കുറച്ച് ദേവസ്വം ബോര്‍ഡ്

പോലീസ് വാഹനം പാർക്ക് ചെയ്യാൻ പോലും സ്ഥലമില്ല. നാട്ടുകാർ ജനകീയ കമ്മിറ്റി രൂപവത്കരിച്ചാണ് സ്റ്റേഷൻ നിർമാണത്തിനുള്ള സ്ഥലം കണ്ടെത്തിയത്. കാക്കയങ്ങാട്-പുന്നാട് റോഡിൽ 45 സെൻറ് സ്ഥലം വാങ്ങി സർക്കാരിലേക്ക് കൈമാറി. തുടർന്ന് 2022 ജനുവരിയിൽ കെട്ടിടം പണി ആരംഭിച്ചു. 1.75 കോടി രൂപ ചെലവിലാണ് കെട്ടിടം നിർമിക്കുന്നത്. 7000 ചതുരശ്രയടിയിൽ രണ്ടുനിലയാണ്‌ കെട്ടിടത്തിനുള്ളത്‌.

പഞ്ചായത്ത് മുൻ ഭരണസമിതിയുടെയും വ്യാപാരി വ്യവസായി യൂണിറ്റുകളുടെയും ഇടപെടൽ എല്ലാ പ്രവർത്തനങ്ങളും ലക്ഷ്യത്തിലെത്താൻ സഹായിച്ചു. പോലീസ് സ്റ്റേഷനിലേക്കുള്ള റോഡിന്റെ കോൺക്രീറ്റ് ഉദ്ഘാടനം കഴിഞ്ഞു. ഏപ്രിൽ അവസാനത്തോടെ കെട്ടിടം തുറക്കാൻ കഴിയുമെന്നാണ് പ്രതീക്ഷിക്കുന്നത്. പരിമിതമായ സൗകര്യങ്ങളിൽ ജോലി ചെയ്ത ഉദ്യോഗസ്ഥർക്ക് വലിയൊരു ആശ്വാസമാണ്.

Muzukkunn police station is all set to shift from a bulge within the premises to its own building.